Shillong, Naitung 11: Mynta ka sngi kala don ka jingpdiang burom ia u Bah HS Shylla sha ka seng UDP, ha ka jingialang kaba la long mynta ka sngi ha iing sah jong u Dr Donkupar Roy, ha ryngkat ki dkhot jong ka seng UDP kiba la wan sha kane ka jingialang.
Haba kren ha kane ka sngi na ka liang jong u Dr Donkupar u la ong ba “ U Bah HS Shylla, u shu bakla lynti, mynta ka seng ka pdiang sngewbha biang ha ba u la wan phai biang sha ka lynti kaba dei, kala bha palat ba u la wan biang” la ong u Dr Donkupar.
Haba ia dei bad ka election MDC, ka UDP kala pynthikna ba u Bah Shylla un long u kyrtong jong ka seng na ka Nongkrem Constituency, la kyntu ia baroh ki nongtrei jong ka seng ba kin ia trei shitom ba kin wanrah ka jingjop kaba don burom jong ka party.
Na ka liang jong u Bah Shylla u la ong ba “ Nga la dep rai mynshuwa ba ngan nym ia khun election shuh namar nga la jop ar sien kum u MLA bad arsien kum u MDC, hynrei dei ki paidbah kiba la kyntu biang ia nga, bad kata ka jingkyntu jong ki kalong halor ki jingjia kiba la jia ha kane ka ri khasi ha u snem 2014, kata ka dei ka kam rangbah shnong, ka MUDA, ki paidbah ki ong wat Shylla wat ieh ia ngi” haba ki ong kumne ngam banse ban khoh ngih ia ki paidbah la ong u Bah Shylla.
Haba ia dei bad ka MDC election shiteng samoi na ka liang jong u Dr Donkupar u la iathuh ba u la dep ban ia kren bad u Bah HDR Lyngdoh myntri ka tand District Council Affair bad ka sorkar kan pynlong ia ka election sha ki hynñiew tylli ki constituency ha u Nailar lane Nailur mynta u snem ynda la kham rang ka bneng.
