Shillong, Naitung 24: Ka Protem Chairman jong ka KHADC ka kong Telinia Thangkhiew mynta ka sngi kala pynbna ba u Bah Teinwell Dkhar u la jop ia ka elekshon kum u Chairman jong ka KHADC ha dien ba u la ioh 17 but bad u Bah Hedrian Lyngdoh u la ioh 10 but, katba u Bah Pynshnginalang Syiem bad ka kong Grace kim shym la wan thep vote.
Na ka liang jong ka KHDA ka don 17 ngut ki MDC kiba la ia trei lang bad baroh 17 ngut kila wan ban thep ia ka vote ha u kyrtong ba ki pynieng da ka liang synshar katba ha ka liang pyrshah kiba don 12 ngut ki ha ka kynhun PDA kiba la wan ban thep but ki long 10 ngut namar ar ngut kila pep noh noh.
Ha dien ba la pynbna ia ka jingjop jong u Bah Teinwell Dkhar la synran ia u sha ka shuki jong u Chairman da u Bah HS Shylla CEM na ka liang synshar bad na ka liang pyrshah la synran da u Bah James Ban Basaiawmoit.
Ha ka jingkren ai khublei ia u Chairman ba thymmai u Bah HS Shylla CEM jong ka KHADC u la ong ba wat la ia u la pynieng da ka liang synshar, hynrei haba shong ha kashuki kum u Chairman um dei ban ia shah liang dei ban bat bad pyniaid ia ka iing dorbar katkum ki kyndon ba la buh.
Kiwei ki para MDC kiba la ia shim bynta ha kane ka jingkren ai khublei nalor jong u CEM ki long u Bah Manstudy Nongrem, Bah Herdrian Lyngdoh, Bah LG Nongsiej, Bah PT Sawkmie bad bun kiwei de ki MDC kila ia shim bynta ha kane ka jingkren ai khublei.
