Shillong, Jylliew 23: Ka KSU South West Khasi Hills ka pynpaw iaka jinglyngngoh iaka jingleh lamwir bad ialam bakla jong u bah Vincent Pala MP , bah Manstudy Nongrem MDC Langrin, ki Nongialam shnong katto katne ha ryngkat ka National Highway and Infrastructure Development Corporation Limited da kaba shu leh mynleh leit lum jingialang paitbah ha Wahkaji ha ka 22 tarik bad pynphriang bakla iaka jingsngew ki paitbah lyngba ki lad pathai khubor. La ong ka kyrwoh kaba la phah da ka KSU.
Ka KSU SWKH ka pynrem jur ia ka jingleh arsap bad shukor ia u paitbah ka thain Wahkaji da u Bah Vincent Pala, Bah Manstudy Nongrem, ki Nongialam shnong bad u Sumitra Kumar Dev, Deputy General Manager NHIDCL da kaba lum tang ia ki katto katne ki nongialam shnong bad ki bym don ka jingkitkhlieh iaka lawei jong ka dong ka thain tang ban pynkbum jubor iaka shyntur jongki paitbah da kaba pynshai bakla ruh ia ka jingshisha halor ka jingthmu jong kane ka surok uranium na Nongstoin sha Mawthabah.
Kum ka seng ka dap daka jinglyngngoh iaka jingleh jong u bah Vincent Pala bad u bah Manstudy da kaba ialam bakla ia u paitbah la kynnoh ka KSU SWKH. Kane kam dei kaei kaei hynrei ka buit politics tang ba kin ioh myntoi ha u snem 2018. Kum ka seng ka lyngngoh ba kumno kine kim tip iaka jingshisha ba kane ka surok kaba naka liang ka MoRTH ka la pybna paitbah ha u snem 2010 lyngba ka Website jongka. Ka KSU kala kynthoh jur ba kane ka pyni ba ki dang dei ki Nongmihkmat ba dang sahdien ha ka jingtip ne ka lah ban long ba ki dei ki suri kup snieh langbrot kiba kloi ban die iaka jaitbynriew tang na ka bynta ka malade shimet.
Na kaliang jong ka KSU ka buh ka jingkylli ia u bah Man bad ia u bah Vincent ” Kaei ki la leh na ka bynta ka roi ka par jongka South West Khasi Hills District, Hato kum ki nongmihkhmat kaei ki la leh halor ka jingbym aiti jong ka UCIL shaka State Govt iaka Wahkaji PHC , Kaei ki la leh halor ka jingorpait jongka dam uranium ka ban sa buh jingma iaki paitbah katei ka thain bad kaei ki la leh halor ka pule puthi bad ki shnong bym pat don surok ha katei ka thain. Ka KSU ka kynnoh ba kine kim dei ki Nongmihkhmat jong u paitbah hynrei ki nongdie ri bad ki agent jongka UCIL.
Ka NHIDCL kam dei kaei kaei hynrei ka dur bula jongka UCIL. Ka Seng ka pynrem jur iaka jingleh jubor jong ki katto katne ki nongialam shnong haba ki la shu pynlong meeting sop sop jongki ha Umdohlun haka 22 tarik tang da ki phew ngut ha kaba kiba bun kim poi pyrkhat ba ka don kaba kum kata ka jingialang paitbah naba wat ki trai shnong kiba dei na Wakaji ruh kim pyrkhat ba kan don kata ka jingialang paitbah.
Ka KSU SWKH ka kyntu ia u bah Pynshngain Syiem ,CEM bad iaka EC jong jong u ba kaKHADC ban nym ai NOC ia kane ka surok ka ban long ka jingtim iaka lawei. Ka ksu ka ai jingiaroh iaka EC ba mynta jong ka KHADC kaba la kren shai hakhmat ka session ba kan nym ai NOC ia ka ban tih uranium.
La kyntu namar kata ba ka dei ban nym ai NOC ia kane ka surok namar kan lam hi sha ka jingtih ia u uranium. Ngi dawa ia u Mukul ba u dei ban kiar na kaba tuklar iaka iktiar bala pynkup bor daka Sixth Scheduled shaka KHADC, kane ka long katkum ka kyrwoh kaba la phah da u bah Shemphang Nonglang Vice President jong ka seng KSU South West Khasi Hills District.
