Shillong, Jylliew 08: U Bah HS Shylla MDC jong ka UDP na Nongkrem, u la dawa ba u Dr Donkupar Roy president jong ka party u hap ban hiar shuki noh bad ban aiti noh ia ka kam ha u Bah Dindo M Lanong lane ha u Bah Paul Lyngdoh ne ha u Dr Jemino Mawthoh ba kin lah ban pyndur thymmai ia kane ka jingiatehlok hapdeng ka UDP bad ka HSPDP na ka bynta ka Election MLA 2018.
Haba kren ha ki nongthoh khubor mynta ka sngi ha Shillong Press Club u Bah Shylla u ong ba, ka jingtyrwa ka jong ki ka long ban ia long baroh ki seng riewlum ym tang kine ki ar tylli ki party ka UDP bad ka HSPDP, ka KHNAM ka don bad ka PDF ruh ka don ha kaba dei ban ia khot bad ia treilang tang kawei, namar dei kane ka por ba ki seng riewlum kin ioh ia ka kabu ksiar ban ioh synshar ha ka jylla ha kaba ka BJP ruh kam pat ioh suhthied bad ki paidbah kila ngiah ia ka seng Congress.
Halor kane ka jingiatehlok jong ka UDP bad ka HSPDP, u bah Shylla u la ong ba kam shym don ka jingiamir jingmut hapoh jong ka seng la shu shim ia ka rai tang da u president Marwei bad u Bah T. Chyne, ha kaba u Bah Bindo, Dr Jemono bad u Bah Paul kim don jingtip ei ei wat la ki don lang ha kato ka sngi ba pynbna ia kane ka jingiatehlok hapdeng kine ki ar tylli ki party.
U Bah Shylla u la ong ba u Dr Donkupar u la konguh ia kaei kaba u Bah Ardent Basaiawmoit u la kwah ba ia ki constituency kum ka Mylliem, Mawkynrew, Sohryngkham bad Nongkrem kan leit sha ka HSPDP khlem da pyrkhat ia u MLA jong ka party na Mawkynrew u Bah Remington Pyngrope, kane ka jingleh ka long u Dr Donkupar Roy u la don ia lade ha ka jingsyier na Shella bad u Bah Ardent u la syier palat na Nongkrem.
Kane ka jingpra jong ka UDP, u Dr Donkupar Roy kum u president jong ka seng UDP u hap ban shim ia ka jingkitkhlieh la ong u Bah Shylla, ha kane ka sngi u Bah Shylla u la pynbna ba un ia khun ia ka MLA Election na Nongkrem hynrei ym shuh na ka UDP party, u la ong ba ha dien ka jingshong dorbar u mih noh na ka UDP. Ka jingtrywa ka jong u ban kyrshan ia u Bah Ardent ka long na ka bynta ka jingmyntoi jong ka jaidbynriew lada baroh ki seng riewlum ki ia tylli, hynrei kane ka jingtrwa ka u la kyntiat.
