Shillong, Iaiong 11: U Brenath M Sangma u la ai ka jingujor sha ki pulit ba ha u Nailur jong u snem 2016, u khun jong u u Jackeus C Marak ba dang 17 snem ka rta la rah ia u na iing ba u sah da u Sanjit M Sangma sha Mysor ban leit trei ha ka dukan sha.
Ha kane ka jingujor la ong ba kila don ruh kiwei ki khynnah kiba la ialam lang da u Sanjit sha katei ka jaka kaba hap hapoh jong ka jylla Karknataka, na ka liang jong u tei u kpa jong u khynnah u la kynnoh ba ia u khun jong u bad kiwei ki khynnah la die ia ki ban trei mraw.
Ha kawei pat ka jingjia ki pulit jong ka Tura kila lap ia kawei ka met jong i khunlung ba dang kha na Wah Ganol kaba don hapoh jong ka West Garo Hills District, na ka jaka kaba la tip kum ka Mukdangra. Ia kane ka met jong ki khunlung la rah sha Civil Hospital Tura ban leh ia kaba don kam.
