Shillong, Jylliew 22: Ka ophis ba pura jong ka tand pathai khubor jong ka sorkar jylla kaba la ap khmih lynti ba kan sdang ban pyntrei noh mynta la bun bun snem kala urlong mynta ka sngi ha kaba u myntri ba dei peit ia ka tand pathai khubor u bah AL Hek u la buh ia u mawnongrim mynta ka sngi, ka jinglut na ka bynta ban shna ia kane ka iing kan long T.9.41 klur tyngka.
Haba kren ha kane ka sngi kum u kongsan u myntri u la ong ba balei kane ka iing kan poi haduh khyndai klur tam ka daw ka long ba kane ka iing ka long kawei na ki iing kiba don kam tam ha ka sorkar namar ha ka kin don bun ki jingdon kam kiba ia dei bad ki kam sorkar kiba man ka sngi, kumta um kwah ban ioh ba ka jingtei ia kane ka ophis kan nang kiew dor na kaba la dep ban mang.
Ha ka juh ka por na ka liang jong u myntri u ka maitphang ba lada u kontrator u la lah ban pyndep ia ka jingtrei haka por ba la buh dei ban ai khusnam bad lada ym lah ban pyndep ha ka por kaba la ia kut dei ban dain kumna, ka dei ban don ka jingiamyntoi lang na baroh ar liang ym shiliang shiliang.
U Cahirman jong ka Meghalaya Government Construction Corporation (MGCC) u bah RV Lyngdoh u la ong ba kane ka iing kan dep ha ka por kaba la ia kut kata ha u bah Lber 2018, u la ong ba bun ki iing sorkar kila sah teng khlem dep da ki bun bun snem bad kane kala wanrah ia ka jingduh nongiaka sorkar.
U la kdew ba kane ka iing kaba buh mawnongrim mynta ka sngi ka long ka iing kaba don kam ha kaba lyngba kane ka iing ia ki skhim jong ka sorkar baroh la pyntip sha ki paidbah khamtam sha ki nongkyndong ia kane ka tand sorkar la dei ban niew kum ka tand kaba kongsan tam.
Kiwei kiba la kren ha kane ka sngi ki long ka Commissioner secretary IPR ka MHK Marak, u Director Bah HM Shangpliang u la ba la kdew ba kumno ka slem ban shna ia kane ka ophis wat la bun ki director kiba la leit noh ki kwah ban sdang noh ban tei ia kane ka iing, kiwei kiba la kren ki long u Managing Director jong ka MGCC u President jong ka Shillong Press club bad u General Secretary jong ka MEPA u kontrator u ba la ia tip kum u bah Deng Rapsang u la don lang ha kane ka sngi.
