Shillong, Jymmang 02: Halor ka jingkren jong u Nalin Kohli nongktiktien jong ka seng BJP u ba dei peit ruh ia ka jylla Meghalaya lyngba ki lad pathai khubor ha kaba iadei bad ka railway project ha ri Khasi, ka Khasi Students’ Union (KSU) ka sngewdei ban ai jingshai ia une u nongialam ka BJP ha kaba ia dei bad ki mat kiba ka jylla bad ka jaidbynriew hi baroh kawei ka mad na ka por sha ka por ha kaba ia dei bad ka Influx lane ka jingrung kyrthep ki mynder ri bad ki bar jylla sha kane ka thain.
Ka KSU ka sngewlyngngoh ba kumno kat u nongialam ba ha khmat duh jong ka BJP u shu kren laplah ban kam ba ka jingwan jong ka rel ha ri Khasi kan ym wanrah ia ka jingtuid ki mynder bad ki bar jylla sha kine ki lum. Kane ka pyni shai ba une u nongialam ka BJP um don jingtip eiei shaphang ka ki jingeh ba ki paid ka ri Khasi ki shem bad kiei ki mat kiba lah ban ktah ia Ri bad ka Jaidbynriew lada wan ka lynti rel. Kumta ka seng ka kwah ban pyntip sha une u khlieh nongialam ka BJP ba ka jylla ka donkam ki ain ki khlain bad ki ba donbor ban tehlakam ia ka jingwan tuid ki mynder bad ki bar jylla sha kane ka thain ha shwa ban ailad ia ka lynti rel ba kan wan shane.
Ka seng ka kwah ban pynsngewthuh ruh ia u ba ka jylla Meghalaya ka donkam ki ain kiba khlain bor kum ha jylla Nagaland bad Mizoram ban tehlakam ia ka jingrung ki briew ba nabar ha shwa ban pdiang ia ka lynti. Kaba ar pat ka jingpynshai ia une u nongialam ka BJP ka long ban pyntip ia ioh um don jingtip eiei ba ka jaidbynriew Khasi ka long ka jaidbynriew kaba rit paid haduh katta katta haba ia nujor bad kiwei pat ki jaidbynriew kiba kerkut ia ka bad ka jingktah ia ka jaidbynriew ba rit paid ka kam wan tang na shabar ri hynrei wat na kiwei ki jylla ruh.
Ka seng ka kyntu ruh ia u Nalin Kohli ba lada u don shisha kata ka jingkitkhlieh na ka bynta ka bha ka miat na ka bynta ki rit paid ka ri India u la dei ban wan jngoh hi sha baroh ki jaka jong ka jylla Meghalaya ban iohi hi da la ki jong ki khmat ba katno tylli ki thain ki la kylla ha kaba ki trai ri trai muluk ki la kylla long ki rit paid bad kumno ka ba ia ka hok ka jong ki la shu knieh ei da kiwei pat ki jaidbynriew kiba wan buhai shnong kum na Bangladesh, Nepal bad kiwei ki jylla ka ri India.
Khatduh khatwai ka seng ka pynrem jur ia kane ka jingkren khlem da thew bad pule janai jong une u nongialam namar kane hi ka pyni ba ma u lehse ka party ka jong u kim don kano kano ruh ka jingsngewkhia ha kaba iadei bad ki trai ri trai muluk jong ka jylla bad kumno ban pynneh pynsah ia ka jinglong trai ka jong ki ha kane ka jylla Meghalaya.
U Nalin Kohli lada u don shisha kata ka jingthrang ban peit ia ka bha ka miat jong ki trai ri trai muluk ka jylla u ladei ban tih bniah shwa ia ka jinglong jingman ka jong ki ha kane ka jylla ha shwa ban ai kino kino ki jingkynthoh namar kane ka jingkren ka jong u ka pynpaw shai ba um don tang khyndiat ruh ki jingtip shaphang ki jingeh kiba ki trai ri trai muluk ki kynduh lyngba ka jingwan rung kyrthep ki briew ban a bar kaba ngi lah ban ong ba um don jingsngew eiei ruh ia ka jingpynneh pynsah ia ki jaidbynriew trai ka jylla hynrei u shu wan tang ban shu pynthame ia ki paidbah.
U Nalin Kohli lada um don jingtip eiei shaphang ki mat jong ka Jaidbynriew ka long lehnohei ba kat u nongialam ba ha khmat duh jong ka BJP un kubur ban trei na ka bynta ka bha ka miat jong ka thain shatei lam mihngi lyngba ka party ka jong u bad ka seng ka kyntu ia u ba shwa ban u kren laplah ha kaba ia dei bad ka railway ha jylla, kum u nongialam jong baroh kawei ka ri India u dei ban peit ia ki jingeh bad trei na ka bynta ka bha ka miat jong ki rit paid ka ri India baroh kawei, bad kum shi bynta ban pyni ia kata, u dei ban kren bad leh pyrshah ia ka rai jong ka sorkar BJP ban khang ot doh masi namar kane ruh kadei kawei ka mat kaba ktah jur ia ka rukom bam jong ki jaidbynriew ka thain shatei lam mihngi kaba ki la ju mlien naduh mynkulong mynkumah.
