Shillong, Rymphang 15: Ka seng HYC kala ai da ka jingujor pyrshah ia ki pulit jong ka jylla Assam sha ka Meghalaya Hunman Right Commission halor ka jingbom pathar ia ki paidbah ha khappud ha ka shnong Umsawli ha ka sngi palei.
Katkum ka jingujor jong ka HYC la ong ba baroh kiba la mynsaw ha kane ka jingjia ki long 28 ngut bad kila da ai ruh ia ka kyrteng jong kiba mynsaw ha kane ka jingshah thombor haki pulit jong ka jylla Assam.
Ha kane ka jingujor ka HYC kala dawa ba ka MHRC ka dei ban pynshitom ia ki pulit jong ka jylla Assam katkum ki kyndon jong ka ain bad ha ka juh ka por ka dei ban ai ia ka jingbethah ban siew bailutksan ia kiba mynsaw.
Ia kane ka jingujor sha ka MHRC la soi da u bah Robertjune Kharjahrin president jong ka seng bad u Bah Roy Kupar Synrem general secretary jong ka seng. U president ka HYC u la ong ba ka dei ka jingujor bad ka MHRC kan sa register mukot duma ia kane.
