Shillong, Naitung 09: Ka KSU EJHDU hapoh ka jingialam u Samla Rangbah Kwilnis Suciang Generel Secretary ka District Unit ka la leit ban buh da ka dorkhas ban pyrshah jur iaka jingioh NOC ki katto katne ki briew ban tei pynbha ia ka jaka mane blei ha jaka sorkar.
Iakane ka jaka ba la thmu ban tei ka don hapoh u pud u sam ka District court Khliehriat bad ha syndah ka Deputy commissioner office. Iakane ka jaka katkum ka jinglum jingtip ka seng la ong ba ha ki snem ba la leit ka dei tang ka jaka mane Blei ki nongtrei surok.
Kata tang shipor hynrei hadein ba kine ki nongtrei surok ki lah mih bad leit phai noh kane kam mane Blei ka la iai bteng da ki katto katne ki bar jylla da ka tei beaiñ iaka jaka mane bad la pynpra noh namar khlem da ioh jingbit ha ki snem ba la leit.
Bad haduh mynta ruh ka dang don ka jingker da ki tin sawdong iakane ka jaka bad la ioh jingtip ruh ba haduh mynta ki la ioh jingbit ia kumba 500 sq feet bad dang pan sa 250 ban shna iaka jaka leit bar.
Kum ban shu pynkynmaw ba iakane ka kam tei iingmane Blei ha ki jaka sorkar ka sorkar jylla ka la pynmih daka Office Memorandum ha u snem 2010 katkum ka Special Leave Appeal (Civil) no 8516 of 2006 ba la rai da ka iingkashari ba don burom ka India.
Lyngba kane ka sorkar ka la shna iaka polisi ba iaki jaka mane Blei lah ban shim bai haka yn siew shi sien siew 25 percent katkum ka dor iew jong ka khyndew lane 494 tyngka shi square feet kaba yn bthah bad pynbeit daka tnat revenue jong ka sorkar jylla.
Hynrei katkum kane ka OM la thoh shai ruh ba iaka ka polisi kan treikam tang haduh u snem 2006 kaba mut iaki jingtei ba palat une u snem la dei lupa kiba beaiñ katkum ka para 5 jong kane ka OM.
Ka jingdon lupa kane ka jaka mane Blei mynta da ki snem ka la pynkhein ain lupa namar ka jingdon jong ka dei ka bym ioh jingbit bad ki lah ban pynkhein katkum ka Meghalaya Public Premises Unauthorised occupation Act 1980.
Ka seng halor ka jingkynduh ka ban jur ba iaki jaka sorkar hi ym dei ban ai jaka ban tei iakino kino ki kynhun niam halor ka nongrim ba ka lah ban wanrah iaka jingniew shiliang bad ka jingbym sngewthuh jingmut.
Ka seng ka maham ba lada iakane ka jingtei iaka Mandir ka iaid sha khmat ka seng kan sa khot iakiwei pat ki riew shimet ne ki kynhun ba kin pan noh iaki jaka kiba dei jong ka sorkar bad ban tei iala ki jong ki iing ne ki jaka mane jong ki hapoh east Jaintia hills district.
Halor kane na ka liang u DC u la mynjur ban pynsangeh shwa iakane ka jingthmu bad ruh ban dang wad kham bniah halor kane ka kam na ka sorkar, ka seng ka ban sa shisien ba da leilei ym bit ban ai jingbit ban tei iaki jaka man Blei ha jaka sorkar kiba dei ki ‘Public Premises ‘ bad ka seng kan iai buddien halor kane .
