Shillong, Nohprah 17: Ka Khasi Student Union Laskein Circle myn haka sngi Nyngkong ba la lah ka la leit ia kynduh ia u
Addl DC West Jaintia Hills ban ujor pyrshah halor ka jingwan tuklar ki pulit ka Assam ban pynsangeh iaka jingtei iaka skul RMSA kaba don ha Psiar.
Haka dorkhas ka Seng ka la ong ba ka Seng ka nud ban pyntikna ba ka Psiar ka dei ka jaka kaba dang hap pura hapoh u pud u sam ka Jylla Meghalaya hynrei naka daw ka jingailad bad ka jingshahjem ka jong ngi bad ki bor pyniaid District kumta ka Assam ka la shlur bad iohlad ban wan tuklar shapoh u pud u sam jong ngi.
Lah ban pynkynmaw ba ka Sorkar India lyngba ka Ministry of Human Resource Development, Government of India ka la sdang ban pyntrei iaka skul iakaba latip kum ka Rashtriya Madhyamik Shiksha Abhiyan (RMSA) naka bynta ban pynbha iaka skul haki kyrdan Secondary haka shnong Psiar West Jaintia, hynrei sngewsih ban ong ba ha kine ki sngi ba la dep ki pulit ka Mukoilum Assam kila wan ban pynsangeh jubor iaka jingtrei iakatei ka skul.
Halor kane ka jingpynsangeh ki Pulit Assam iaka jingtei iakatei ka skul, naka liang ka Seng ka kyrpad jur ia ki bor Sorkar ba kin sngewbha ban tuklar halor katei ka kam mar mar khnang ba kan nymktah iaka jingthmu ban pyntrei iakatei ka Iingskul.
Naka liang u Addl DC ula kular ban shimkhia iakane ka kam bad u la ong ruh ba un sa shong pyrkhat halor kane bad kiwei ki khlieh pyniad district. Kane ka long katkum ka kyrwoh ba la pyllait da u President ka KSU Laskein Circle u samla Balawan Suchiang bad u samla Javeline Shadap Manner Organising Secy KSU Laskein Circle.
