Shillong, Naitung 19: Ki Pulit jong ka East Jaintia Hills District kila wan hiar sha Shillong bad da ka jingiatrei lang bad ki pulit jong ka East Khasi Hills District kila ioh ban kem ia ki ar ngut ki nongkhaii drok na kane ka nongba Shillong, ka Lheineihoi Hoakip 40 snem bad ia u Khailen Hoakip 42 snem, kine ki dei na Boljang Churachanpur na Manipur.
Ka jingioh ban kem ia kine ki ar ngut ka long ba ki pulit jong ka East Jaintia Hills District ha ka 16/7/2023 kila ioh ban kem ar ngut ki nongkhaii drok kiba la wan da ka Tourist Taxi na Manipur, ka Hohoi Lhanghal 35 snem, ka Ling Hoakip 40 snem bad na kine la ioh ban kurup 197.35 gram u drok Heroin.
Ha ka jingtohkit ki pulit kine ki ar ngut kila phla ba ki wan ban pynpoi ia une u drok ha kawei ka briew kiba la tip kyrteng kum ka Ngai Rami 28 snem kaba sah iingwai ha Nongmynsong, ha ka 16/07/2023 kila wan kem ia katei ka briew na Nongmynsong.
Ha kane ka jingtohkit ka Ngai Rami 28 snem kala phla ia ka kyrteng jong kitei ki arngut kaba ki pulit jong ka EJH District kila wan ban kem na Shillong, ka jingkem ki pulit ia kitei ki nongkhaii drok ka dei na ka jaka kaba la tip kum ka Nongsning da ki pulit ka East Jaintia Hills.
