Shillong, Lber 04:Shibynta ban pynneh pynsah ia ki dohum doh wah khnang ba kin ym duh jait, ka Confederation of Ri Bhoi People (CORP) Raid Mawbuh Circle lyngba u President Bah Agustine Nongrum ka la maham tyngeh ia ki paidbah nongshong shnong kiba shong basah hapoh ka Raid Mawbuh bad ka thain hi baroh kawei ba kim dei ban leh pathar ne bret ia ki dawai bih ha ki wahduid bad khamtam eh ia ka wah Umiam naduh ka Dwar Ksuid haduh ka Wah Nonglum.
“Ka seng ka la lap dang ha ki khyndait sngi ba la don ki briew kiba la bret dawai bih ha ki bynta jong ka Wah Umiam ban pyniap ia ki dohkha bad kiwei kiwei,” la ong u Bah Nongrum.
Kumta, ka la maham jur ia ki briew ba kim dei pyniap dusmon ia ki dohkha da kaba bret dawai bih ha ki wah ha katei ka thain bad lada lap iano iano kiba leh ia katei ka kam ka seng kan ym map satia bad kan ai ka jingpynsaja kaba tyngeh katkum ka ain, ula pynkut.(SP News)
