Shillong, Nailar 28: ka jingialang jong ka seng HANM seng kmie kala shong kyrkieh mynta ka sngi ban ia kren halor ka jingshah ujor ejahar u President ka seng HANM jong ka East Jaintia Hills District u Bah NC Shadap, halor kane ka seng kala shim ia ka rai ban weng noh shipor na ka seng katba ka jingtohkit kam pat dep.
U bah C Pyngrope General Secretary jong ka seng u la ong ba ka long kaei kaei kaba sngewsih ban don kum kane ka jingshah kynnoh ia ki nongkit kam jong ka seng, halor kane ka seng kala shim ia ka rai ban wengnoh shipor katba ka jingtohkit ka dang dang halor kane ka jingshah kynnoh.
Ha ka juh ka por la ong ba kaei kaba la jia ia u bah NC Shadap ka dei ka kam jongu shimet, kum ka seng kam don bynta ei ei bad dei halor kane ka nongrim ba ka seng kala weng noh ia u shipor kum u president ka seng jong ka East Jaintia Hills.
U Bah W Sohtun u la ong ba ha ka ejahar kaba la ai pyrshah ia u bah NC Shadap ruh ka paw tang ia u shimet kam dei ia ka seng, kum ka seng kaba trei na ka bynta ka bha ka miat ki paidbah kam kwah ban iohi ba ki nongialam ka seng kin shah kynnoh ha kum kine ki bynta.
U bah Lamphrang Kharbani President, u la iathuh ba ha kane ka jingialang kaba la long mynta ka sngi ka seng kala thung noh ia u Bah Shaniahlang Suchen ban shimti ia ka kam President ba shipor jong ka seng. La bthah ruh ia baroh ki unit ba ki dei ban pyntip sha ka seng kmie lada ka don kano ka kam ka kam kaba kin leh.
Ha ka juh ka por ka seng ka buh ka jingkyntu ia baroh ki nongkit kam jong ka seng ki shnat ki District ba kim dei ban pyndon kam bakla ia ka kyrteng jong ka seng na ka bynta ka jingmyntoi jong ki shimet. Na ka bynta ka jingiaid beit jong ka kam ha Jaintia Hills ka seng kala thung ia u bah Roiwan Sohtun ba un long u nongpeit.
