Shillong, Jymmang 01: Ka Khasi Authors’ Society (KAS) kum shi bynta jong ka jingrakhe ïa ka jingdap 175 snem ka jingwanrah ïa ki dak-thoh Khasi, kan pynlong їa ka jingpynshai paidbah bad ka jingїaid pyneh rngiew їa ka ktien Khasi ha ka 5.5.17.
Ka jingїalang kan sdang ha ka por 11.30 A.M. ha Їing Dorbar Shnong Jaїaw Shyiap ha kaba u Pa’iem Phylla Sing Syiem, Syiem Nongstoiñ un long u Kongsan. Kan don “Ka jingїaid pyneh rngiew їa ka ktien Khasi” shaduh Madan Student, Jaїaw bad ban pynkut ïa ka jingïalang. Ki nongїalam jong ki seng bapher bapher kin wan ban kren halor ka jingdonkam ban kyntiew їa ka ktien Khasi.
Ka KAS ka wer їa ki samla samhoi, ki khynnah skul bad kolej, ki longkmie longkpa bad ki paidbah nongshong shnong baroh jong ka nongbah Shillong ban їasnoh kti lang ha katei “Ka jingїaid pyneh rngiew їa ka ktien Khasi”.
La kyrpad їa baroh ki Dorbar Shnong bad ki Seng Bhalang hapoh ka nongbah ban kyntu їa ki nongshong shnong/ki unit bad ki dkhot jong ki baroh ban їa mih paidbah ha katei ka sngi. La kyrpad ruh їa ki Principal jong ki skul ha ki thaiñ Jaїaw bad Mawkhar ban phah їa baroh ki khynnah Class IX, X bad XII; katba ïa ki Principal jong kiwei pat ki skul hapoh ka nongbah la kyrpad ban phah tang їa ki khynnah Class XII.
Ka KAS ka wer ïa baroh ban ïa mih paidbah na ka bynta kane ka dawbah ban kyntiew bad ban pynïoh jingithuh ïa ka ktien Khasi.
