Shillong, Naitung 01: u General Secretary jong ka seng Bharatiya Janata Party (BJP), jong ka Meghalaya state unit u Bah David Kharsati u la ong “ ym dei tang u Rajiv Mehta u ba lah ban ia khun pyrshah ia ki lehnoh, baroh ki ophisar ki long kiba tbit”.
Kane ka jingkren jong u Bah Kharsati ka dei halor ka jingkynnoh jong u myntri rangbah ka jylla u Dr Mukul Sangma pyrshah ia ka sorkar BJP, ba ka khlem pdiang ban pynjlan ia ka jingtrei jong u DGP ba la shongthait noh. La ong ba kane ka jingkynnoh ia ka sorkar pdeng ka dei tang ka jingkynnoh ka bym don jingmut ei ei ruh em.
U Bah Kharsati u la ong ba ka rukom pyrkhat jong ka BJP ka long ba ym dei ban pynjlan ia ka jingtrei kam jong u ne kano kano ka ophisar kaba la dei ban shong thait, ka BJP kam kwah ia kane, lait noh tang lada don ha ka saw ka sian, lada shong thait noh u wei u ophisar ai kito kiba don ha dien kin kiew kyrdan namar ki ruh ki lah ban trei ia ka kam.
Ha ka kyrteng jong ka jingiakhun pyrshah ia ki lehnoh yn pynjlan noh ia ka jingtrei kam jong u DGP ka long kaba ym lah ban pdiang, haba ia khun ia ki lehnoh ha ka jylla ym dei tang u DGP marwei, hynrei baroh ki ophisar ki ia don kti lang. Ki lehnoh ki leit bad ki wan.(SP News)
