Shillong, Jylliew 01: Sdang ka jingiakren ki Khlieh Nongsynshar halor Ki Law Kyntang – Rai ki Dolloi Jaintia Hills ban ia trei lang bad ka SPIKAP lyngba ka scheme GEF/ UNDP ban pynneh, pynsah pynkhraw ia ki Law Kyntang, Law Hima, Law Raid, Law Adong Shnong, Law Kur, bad ki Law shimet.
Ka jingialang ba la pynbeit lang da u Ma Wenly Dhar, Dolloi Elaka Shangpung bad u Bah John F Kharshiing, Co-Chairman, MSPB, Chairman, Ka Dorbar Ki Khlieh Nongsynshar Ka Ri Hynniewtrep & Chairman, Ka Society for Promotion of Indigenous Knowledge and Practice (SPIKAP), ka la long ha ka shnong Shangpung ha ka 29 tarik May 2014.
Ha katei ka jingialang ba la pyniaid da u Dolloi Shangpung, la don lang ki dkhot rangbah jong ka Elaka Shangpung, kynthup lang u Ma Comet Rymbai, Dolloi Elaka Jowai, u Ma Chawas Lyngdoh, Dolloi Elaka Rymbai, bad u Ma Erudith Sutnga, Dolloi Elaka Sutnga.
Ha kaba kren bad pynshai ia ka jingthmu jong katei ka jingialang, u Bah John F Kharshiing, Chairman, Co-Chairman, MSPB, & Chairman, Ka Society for Promotion of Indiginous Knowledge and Practice (SPIKAP), u la pyntip ba ka SPIKAP ka la thoh sha ka GEF/ UNDP (United Nations Development Program) naduh u snem 2010 (saw snem mynshwa), bad hadien ka jingiatai ka jingiabuddien kaba jur katei ka office ha u January 2014, ka la pdiang ia ka jingpan jingiarap ka jong ngi bad la mang 24 Lak kum ka jingsdang kaba yn pyllait ha ki saw bynta (four installment) ban pynlong ki jingiasyllok bad ki shnong ki thaw kiba sawdon kitei ki khlaw, ban iada, pynneh, pynjanai bad ban nang pynheh lane pynkhraw ha baroh ki liang ia kitei ki Law Kyntang, Law Hima, Law Raid, Law Adong Shnong, Law Kur, bad ki Law shimet ban noh synniang kaba rit kum ka jingsdang kaba ki khot ‘pilot project’ na ka bynta katto katne tylli ki Law Kyntang, Law Hima, Law Raid, Law Adong Shnong, Law Kur, bad ki Law shimet, kum ka jingsdang ia ka jingiatrei lang. Ia katei ka pilot pro
Ha ka juh ka por katei ka office ka la ai jingmut ai ksai ban thaw ki lad ban khmih lada don ne em ki lad ban wanrah ka jingiatrei lang jong ki paidbah, ki longkmie, ki samla kynthei bad shynrang ha ki Shnong, Raid ki Hima/Elaka kiba sah sawdong kitei ki khlaw, ki um ki wah, khnang ban khmih lada don ne em ki lynti ba kin kylla long ki lad kyntiew ia ka imlang sahlang, ki kam jngoh kai (tourism), ban thaw lad kumno ban buh jingthoh ia u pud u sam, ban pynmih ia ka map, ia ki kyrteng jong ki longshwa, ia ki khana pateng jong ki jong kito ki khlaw kiba kyrpang, ban buh jingthoh ia ki kyrteng jong ki um ki Wah, ban buh jingthoh ia ka kyrteng ki nongsumar, ki trai, bad ki rukom pyniaid lane synshar ia kitei ki khlaw, ban khmih bniah ia ki jait kynbat kiba don ha kitei ki khlaw, ka ioh ka kot lyngba ka jingpynneh jingpynjanai ia kitei ki khlaw, ki um ki wah, ki jingiada ia ki mrad khlaw bapher bapher, bad kiwei kiwei na ka bynta ki pateng kiban wan.
Ha katei ka GEF/UNDP grant katei ka office kum shibynta ban nang wanrah ia ka jingmyntoi sha ki nong ri, nongsumar, ki nongpyniaid jong kitei ki khlaw ka la ai jingmut ia ngi ban ia syllok, ia trei lang bad baroh ki tnad Sorkar khamtam bad ka program River Basin jong ka Sorkar Meghalaya, khnang ba kitei ki bor Sorkar kin sngewthuh kin shim khia kin thaw ki lad ki lynti ban iarap iada, pynneh, pynjanai, ia kum kine ki jaka kiba long ka jingim jong u bynriew ha kane ka sla pyrthei.
U Bah John Kharshiing, u la ong ba ka khubor kaba bha ka long ba mynta la mih sa kawei ka iew ha kane ka pyrthei kaba kyrteng ka ‘iew carbon trading’ bad katei kadei ka iew die lyer carbon. Ka don ka lad mynta ia ki nongri nongsumar, ki trai kitei ki Law Kyntang, Law Hima, Law Raid, Law Adong Shnong, Law Kur, bad ki Law shimet, ban ioh ka jingsiew namar ka jingpynneh ia ki khlaw lyngba katei ka iew hynrei hap ban pynbiang ia ki dulir ki kot ki sla kiban pyni ia ka jingtreikam jong kitei ki nongpyniaid jong kitei ki khlaw.
U Bah John F Kharshiing, Chairman, SPIKAP, u la pyntip ba hadien ba la ioh ia katei ka rai bad ka shithi na ka GEF/UNDP u la pynlong ka jingiakren bad ki bor Sorkar Meghalaya kynthup ia u ki officer jong ka tnad Meghalaya Intergrated Basin Development and Livelyhood Program (MIBDLP), ki officer jong ka Forest bad kiwei kiwei.
Katei ka jingialang ki Dolloi ki la pynpaw ia ka jingsngewnguh ka jingkmen ba mynta la sdang don ki jingiakren halor kitei ki Law Kyntang, bad ki la ong ba haduh kine ki sngi ki dang ioh tang shisien lyngba ka jingiarap jong u Bah John Kharshiing, ha kaba ki la ioh ia ka MPLADS scheme na u MP Rajya Sabha barim u Bah Robert Kharshiing, Ex-MP(RS) uba la noh synniang ka scheme kaba rit na ka bynta ki Law Kyntang hapoh ka Ri Khasi Jaintia, san snem mynshwa.
Katei ka jingialang, ka la shim ia ka rai ban lum bad wer ia baroh ki nongpyniaid ki nongsumar, ki trai khlaw, ha kane ka bri hynniewtrep kiba kwah ban pynneh ia la ki Khlasw ban lum ki jingtip kynthup ia ka history jong kitei ki Khlaw bad ban phah sha ka office jong ka SPIKAP, hapoh ar bnai. La shim ruh ia ka rai ba ki dolloi ha ryngkat ka seng bhalang SPIKAP, kin lum ia ki Shnong kiba ker sawdong ia kine ki khlaw bapher bapher ban pynlong ka jingiasyllok halor kumno ban ioh ia ka jing sngewthuh ban iada pynneh bad ban nang pynjanai ia ka rukom im u bynriew ha ryngkat ka Mew Ram-ew.(SP News)
