Shillong, Risaw 19: Ka Hynniewtrep Youth Council (HYC) mynta ka sngi ka 19 tarik u Risaw 2024 ka la ioh ban pynlong ia ka Central Executive Commtte (CEC) ha ka ba kala shim ia ka rai ban leit tur sha Secretariat ha ka 8 tarik u Naiwieng 2024 bad kala dawa ruh na ka Sorkar Jylla ba kan iakren bad ka Sorkar Pdeng ha ka ban buh noh daka ophis jong ka tnat Narcotics Control Bureau (NCB) ha Nongbah Shillong.
Haba kren sha ki lad pathai khubor u President ka HYC Bah Roy Kupar Synrem u la ong ba ka jingdon ka ophis NCB ha Shillong, kan iarap ban peitngor bad buddien iaka jingrung u drok na kiwei ki Jylla sha Meghalaya.
Ula iathuh ba dang shen u Myntri Khynnah ka Sorkar Pdeng ba khmih iaka tnat Home Affairs, u Nityananda Rai, u a thoh sha u MP ka Tura daka ba pyntip ba ka Meghalaya kadei ka jaka rung u drok ym tang hapoh ka thain shathei lammihngi (North East) hynrei ha baroh kawei ka Ri India.
U la iathuh ba haduh mynta ki ophis NCB ki don ha Assam, Arunachal Pradesh, Manipur bad Tripura hynrei ka Jylla kam don ia kane ka Ophis watla ka jingkhaii ia u drok ka jur bha lyngba ka Jylla Meghalaya.
Nalor kane, une u Nongialam ka HYC ula ong baka Sorkar Jylla kadei ban thaw kyrpang ia ka shnat treikam jong ki Pulit ban tohkit halor ka jingkhaii ne dih drok hapoh ka Jylla.
U la ong ba Ia kane ka kynhun Pulit ba kyrpang ka Sorkar ka lah ban khot da kano kano ka kyrteng ruh kam pher hynrei kadei ban don pat da ka kynhun ba kyrpang la kadei ka Anti Narcotic Task Force (ANTF).
Hynrei kadei ban kren shai ba kata ka kynhun kan peit thik ia ki case halor u drok, la ka dei ban peitngor iaka jingwan rung u drok hapoh ka Jylla ne ban tohkit iaki case kiba dei hapoh ka Narcotic Drugs and Psychotropic Substances (NDPS).
U Bah Roy u la ong ba lada thaw daka kynhun Pulit kyrpang, ka Sorkar kadei ban pynthikna ba kine ki Pulit kidei ban ioh ki jingshah hikai pyntbit haba iadei bad ki sienjam ban shim na ka bynta ban tehlakam ia u drok.
U bah Roy u la pyntip ruh ba ka seng kan sa leit sha baroh ki district head quarter jong ka Jylla ban leit pynsngew thuh sha ki paidbah bad ban iawer ia ki paidbah sha ka jingialang paidbah ka ba heh ka ban sa long ha Nongbah Shillong.
U la pyntip ruh ba ha ka 25 tarik u Risaw ka HYC kan ioh ban pynlong jingialang ha Umsning, ha ka 28 tarik kin leit ban pynlong ha Nongstoin, ha ka 29 tarik kin leit ban pynlong ha Nongpoh, ha ka 30 tarik kin leit ban pynlong ia ka jingialnag ha Iewmusiang, Jowai, ha ka 31 tarik kin ioh ban pynlong ha Iew Mawkyrwat.
Ha ka 1 tarik u Naiwieng kin leit ban pynlong ha Khliehriat, ha ka 2 tarik ha Mairang. U la ong ruh ba kin don ki jingialng ha poh ka nongbah Shillong ha ki dong bap her bapher bad hadien kane kin sa pynlong da ka Rally ka ba heh kaban long ha ka 8 tarik u Naiwieng 2024 ha ka ba da u paibah kin leit ban tur sha ka jaka trei kam u paidbah Secretariat.
