Jowai, Nohprah 03: Kumba ka long mynta ka Ri India kan pyndon kam noh da ki kor ki bor ha ka khaii pateng ban nym rah pisa shuh ha kit ha kaba leit siew leit tda, na ka liang jong ka ophis jong u Deputy Commissioner Jowai kan pynlong ia ka jingai jinghikai ia ki nongkhaii ha ka 8 tarik mynta u bnai ha DC Ophis.
Kane ka jingai jinghikai, kin ia don lang ki briew na ki bank kum na ka SBI bad HDFC, kane ka jinghikai kaba ban long ha katei ka sngi kan long khamtam eh ia ki nongkhaii bad ki nongdie jingdie ba pynsngewthuh ia ki kaei ka jingmyntoi da kaba pyndon kam ia kine ki mashin ha ka ia siew ia tda da kaba buh ia ki mashin “Point of Sale”.
Ka jingmyntoi da kaba pyndon kam ia kine ki mashin PoS ha ki dukan long ba ka pisa kaba die jingdie kaleit beit sha ka account jong ki ka dor bai wai ia kine ki mashin ka long tang hapdeng 200 bad 300 tyngka ha ka shibnai.
Kane ka rukom kan iarap ban tip katno ka don ka pisa ha ka account jong ki nongdie bad kan lait na ka jingshah tuh shah lute ha ka leit ka wan bad kaba kongsan tam eh ka long kan iarap ha kaba kyntiew ia ka khaii pateng jong u ne ka nongkhaii.
Da kane ka rukom kaba thymmai ka long ba ia kaei kaei baroh kaba ia dei bad ka khaii pateng ki nongkhaii ki tip lut namar kan wan ka jingkhein ha ka mobile ba ki bat ha ka kti jong ki. Na ka liang jong ka ophis ka pynshlur ia ki briew ba kin siew ia ka jingsiew jong ki lyngba ki Cards kaba ki don.