Shillong, Naiwieng 28: Ki nongialam jong ka Khasi Jaintia Presbyterian Assembly mynta ka sngi kila leit ban ia kynduh ia u myntri rangbah ka jylla u Dr Mukul Sangma ha ophis treikam jong u ban ai khublei ia u halor ka jingithuh jong ka sorkar ia ki kam ba ratbah jong u Rev Thomas Jones.
Ka jingithuh jong ka sorkar ia ki kam ba ratbah jong u Ren Thomas Jones ka long halor ka jingpynioh ka jong u ia ki dak thoh ha ka ktien khasi namar dei lyngba jong u ba ia ki dak thoh ha ka ktien khasi u la sain dur kumba ka long mynta.
U Rev Thomas Jones u la wan sha kine ki lum khasi ban ialap ia ka ktien jong u blei ha u snem 1810-1849. Ha kine ki snem kiba u la don ha kine ki lum khasi u la trei bor bah ban wanrah ia ki dak thoh khasi bad kum ka jingburom ia u ne u riew rangbah ka sorkar kala rai ba ka 22 tarik bnai jylliew kan long ka sngi shuti ha ka jylla man u snem.
