Shillong, Jymmang 09: Ki nonghikai hapoh ka jingialam jong u Principal bad u President jong ka Khadsawphra college kila pynlong ia ka jingiakynduhlang hapoh ka kamra ba la shna kyrpang ban long ki jingialang hapoh ka college ia kaba la tip ha ka ktien nongwei “Conference Room”.
Ha kane ka jingiakynduh kila ia tai snai bad phylliew jingmut ba kumno ban pyn janai shuh shuh ia ki jinghikai ha kane ka college. Kane jingiatai kala mih ha dien ba ka college kala ioh ia ka jingithuh ba pura ia kaba la tip kumka “Affiliation” na ka skul bah NEHU ha kaba la don lang baroh ki khlieh nonghikai na ki shnat jong ki nonghikai na ki subjek bapher bapher.
Na ka liang jong ka college kala dep ban thung saw saw ngut ki nonghikai ha kawei ka wei ka subjek, ha dien ba kila ia kren sani ha kane ka jingialang la shim ia ka rai ban thung shuh ia ki nonghikai ba ha kawei kawei ka subjek kin don hynriew ngut ki nonghikai haman la ki subjek.
Haba ia dei bad ka Library ka college kala shim ia ka rai ban pynbiang ia ki kot ki sla kiba don kam na ka bynta ki samla pule jong kane ka college bad kum juh ki kor Komputer katkum ka jingdon kam kane ka juk kaba mynta.
Ha kane ka jingiakynduh ka jingialang kila shim ruh ia ka rai ban ban pynbeit lypa ia ki programme jong ka college na ka bynta shisnem lynter khang ba kan pynsuk ia ki samla pule ha kaba ia dei bad ka jingpyniaid ia ka college ha bynta bapher bpaher, ia kane la leh khang ba ki khynnah kin tip ia kaei kaba ka college kan leh na ka bynta jong ka shisnem.
Haka juh ka por ka college kala pynbna paidbah ba ia ki aplikoshon phom ban rung klass ha kane ka college la sdang ban ai paidbah na ka bynta ka jingpule ha ka kyrdan klass XI bad ha ka kyrdan pule Bachelor ha ka Arts bad Bachelor ha ka Commerce. Ia ki phom lah ban leit shim na college ha ki sngi long klass.
U Bah Boldness L Nongum principal jong ka college u la iathuh ba kan don ka jingia jinghikai ba kyrpang ia ki samla ki ban wan pule ha kane ka college shuwa ba kan sdang ka jinghikai ba kyrpang lyngba ki nongkynpham lane ki counsellor kiba ka college kala thung kyrpang khang ba ki samla pule kin sngewthuh ha kaba ki shim ia ki subjek ha ka jingpule ka jong ki. Ia kane ka jinghikai yn pynlong ha ka taiew ba ar jong u bnai Jylliew.
