Shillong, Iaiong 26: Ha dien shisngi ba ka sng HYC kala leit ban jurip ia ka jaka bala shan iing beain ki poiwir ha Lum Survey bad la lap ba la ring light beain sha kitei ki iing, ka MeECL mynta ka sngi ka leit ban jurip ia katei ka jaka bad la shem ba ka jingring light beain ka dei na dukan Ajmera Marbable.
Ki nongtrei ka MeECL kila ot noh ia ki wire kiba la ring ha katei ka jaka bad dkhot ia ki wire light ban pynthikna ba la ot ia ka light na katei ka jaka sha ki iing bala shna beain hangtei ha Lum Survey.
U President ka HYC u bah Roykupar Synrem la ong ba halor ka jingmih khubor ba ka seng kala lap ba don kiba la ring light beain mynta ka sngi ki nongtrei ka MeECL mynta ka sngi kila wan ban jurip bad leh ia kaba don kam.
Na ka liang jong ka HYC ka ai khublei ia ki briew jong ka MeECL kiba la wan leh ia kaba don kam hynrei ha kajuh ka por ka pynpaw ia ka jingsngewdiaw ba ki bor sorkar ki kyndit bynriew tad ynda kum ka seng ki pyni ia ka jingduna ki bor sorkar ki sa kyndit.
Ka jingkylli ruh ia u meter reader u leh aiu haba u leit ban ai bill light man u bnai ba ym lah ban peit ba ki don kiba ring tuh ne ki ai light beain bad ka MeECL ba ka dei ban leh ei ei bad ka MeECL ka dei ban thung ia ka kynhun tohkit.
