New Delhi, Rymphang 18: U Myntri Rangbah duh jong ka Ri India u Narendra Modi mynta ka sngi u la buh ia u mawnongrim ban shna ia ki ar tylli ki jingkieng iaid kali halor kawah Brahmaputra, kawei na Dhubri Assam sha Phulbari Meghalaya, kane ka jingkieng ka jrong haduh 19.km bad kawei pat ha manjuli ha Assam.
Ka jingdawa ki briew jong ka jylla Meghalaya bad Assam ban don ia ka jingkieng iaid kali halor kane ka wah Brahmaputra na Dhubri sha Phulbari ka dei ka jingdawa kaba la palat shiphew snem mynta ha kaba la pynurlong mynta ka sngi ia ka jingkwah ki paidbah jong kine ki ar tylli ki jylla.
Kane ka jingkieng ka dei ka 4-lane, ha ka jingkren jong u myntri ba dei peit ia ki kam shna surok u Nitin Gadkari u la ong ba ynda la dep ban shna ia kane ka jingkieng kan sa pynlyngkot ia ka leit ka wan ha pdeng ka jylla Assam bad Meghalaya 203 km bad lyngba kane ka jingkieng yn pyniasoh ia ka jylla Assam, Meghalaya bad ka jylla West Bengal.
Ka jingtei ia kane ka jingtrei kan sa sdang ha u bnai Risaw mynta u snem, kane ka jingkieng kan pynjan ruh ia ka leit ka wan sha Bhutan, Bangladeh, sha Manipur, kane ka jingkieng kan hap ha ka surok bah 127B bad ka jingtei ia kane ka jingkieng kaba 19 km kan long ha ka jinglut kaba kaba T.4997 klur tyngka.
Ka sorkar pdeng kala ai ia ka jingmynjur ban tei ia kane ka jingkieng ha u bnai Rymphang 2019 bad ia ka jingtrei la ai ha u Naiwieng 2020 bad ia kane ka jingtrei la buh ban pyndep ha u snem 2028. Kane ka jingkieng kan pynjan ia ka leit ka wan sha Meghalaya, Manipur, Mizoram, Tripura bad sha ki them Barak ka jylla Assam.
