Dawa ka EMRI Workers Union ban shimti noh ka sorkar jylla ia ka jingpyniaid ia ka 108

Shillong, Naitung 11: Ka kynhun jong ki nongtrei hapoh ka EMRI 108 ia kaba la tip kum ka EMRI Workers Union mynta ka sngi kala leit ban ia kynduh ia u Deputy Chief Minister jong ka sorkar jylla u Bah Prestone Tynsong ban ia kren halor ki jingeh kaba kum ki nongtrei ka EMRI 108 ki ia kynduh.

Haba kren ha ki lad pathai khubor ha dien ba la ia kynduh ia u Deputy Chief Minister u bah Roipar Kharaswai u la iathuh ba kim hun ia ka jingjubab jong u myntri namar u la bethah ia ki ba kin leit ban ia kynduh ia ki nongpyniaid ia ka GVK ha kane ka jylla.

La iathuh ba ki jingdawa jong ki ki don haduh 36 tylli bad na kine lai tylli ki hap haka sorkar jylla bad 33 tylli ki hap hapoh jong ka GVK kiba pyniaid ia ka EMRI ha kane ka jylla. Ki lai tylli kiba ka sorkar kala kular ban leh ka long ha kaba ia dei bad ka tulop, ki jaka sah bad ki sngi shuti.

U Bah Kharaswai u la ong ba kala dei ba ka sorkar jylla ka dei ban shimti noh ia ka EMRI 108 namar ka jingbei pisa mynta ka long 100% na ka sorkar jylla bad haba ka sorkar ka sngewthuh ia ka jingdon kam kine ki EMRI 108 balei kam lah ban shimti.

Kumba ka long mynta ki nongtrei ha kane ka EMRI 108 kim don ka jingshngian ha ka kam namar ki lah ban shah beh ha kano kano ka por bad kaba eh ka long ba kila pynduna ia ki nongtrei kiba don mynta ha ki 43 tylli ki jaka ba don ka EMRI ha ka jylla ki long tang 205 ngut baroh.

Naduh bala sdang ia ka EMRI 108 ha u snem 2008 kala iaid beit kam shym don kano kano ka jingduna hynrei hadien mynta khyndait snem kila mih bun ki jingeh ha kaba ia dei bad ki nongtrei bun na ki nongtrei ki mih noh haba kila ioh kam shawei lane ki phet noh. Kane ka buh jingeh ia ki paidbah namar kane ka dei ia ka iap ka im jong ki paidbah.

What Next?

Recent Articles

Leave a Reply

Submit Comment

*