Shillong, Naiwieng 22: ka jingialang ba ar sngi jong ki shipai suin jong ka thain mih ngi kala sdang mynta ka sngi ha Shilong hapoh jong ka Eastern Air Command (EAC) ia kaba la plie da u khliehduh jong ki shipai suin u Air Chief Marshal BS Dhanoa, ia kaba la pdiang burom da u Air Marshal R Nambiar jong ka EAC.
Haka jingkren jong u khlieduh jong ki shipai suin u Air Chief Marshal BS Dhanoa, u la ai ka jingiaroh ba kum ka kynhun shipai kila bat shisha ha lade ia kata ka jingkut jingmut hapoh ka kynhun shipai kaba ki don ban kyntiew ia kane ka kynhun shipai bad u la ong ba dei ban dang pynkhlain shuh shuh ha kane ka dong mihngi.
U la ban jur ba dei ban don ia ka mynsiem nongialam kum ka kynhun bad ba ki dei ban long ki ba bat ia ka jingiaid beit iaid ryntih namar kane ka long ka bynta kaba kongsan tam ban poi sha ka thong.
Ha kane ka jingialang jong ka Commander Conference la sam ruh ia ka khusnam ‘Air Chief Marshal awarded’ ia kane ka khusnam la sam namar ka kynhun shipai suin jong ka lam mihngi kala lah ban bat ia ka rukom pyniaid ia ki kam, ka jinglah ban pyniaid beit ia ki kam. Ka kadliengsuin shipai suin jong ka Guwahati kala ioh ia ka khusnam ‘Pride of EAC’ Trophy, bad ka kad liengsuin Salua kala ioh ia ka ‘Best Non-Flying Station’.
Ha ka juh ka por ka Kamalpreet Dhanoa, President AFWWA kala pynlong ia ka jingialang la ka jong bad ka Presidents AFWWA jong kane ka thain bad kiwei kiwei ki riew kynthei kiba la don lang ha kane ka jingiakynduh.
