Shillong, Kyllalyngkot 12: Ka Khasi Students’ Union (KSU) hapoh ka jingialam u samla Donald V. Thabah (General Secretary) ka la leit ban jurip bad hiar tohkit halor ka jingjia ha Tripura kaba la jia ha ka 08 tarik Kyllalyngkot 2019 ryngkat bad ki nongialam ka NESO bad All Assam Students’ Union kiba kynthup ia u bah Samuel Jyrwa (Chairman, NESO), u Sinam Prakash (Secretary General, NESO), u Dr. Samujjal Bhattacharya (Advisor, NESO) bad u Pritam Hazarika (Central Member, AASU) mynnin bad mynta ka sngi kata ka 10 & 11 tarik u Kyllalyngkot 2019. Ka kaiphod ba kane ka kynhun ka la pynkhreh halor kane ka jingjia ka long.
Ha ka step jong ka 10 tarik u Kyllalyngkot 2019 kaba dei ka North East bandh ba la khot da ka NESO ka la don ka jingialang jong ki dkhot ka Tripura Students’ Federation ha ka surok bah jong ka Madhab Bari, Jirinia Sub-Division, West Tripura kum shi bynta ban pyrshah ia ka Citizenship (Amendment) Bill 2016 hapdeng ka jingpahara kaba jur bha jong ki pulit ka Tripura State Rifles.
Kynsan kynsan la wan mih ka kynhun paidbah kiba rah ia ki lama rong stem bad ki la pyrta, pyndom bad kren bein kren khoh ia ki dkhot ka TSF bad ki Jaidbynriew riewlum. Hapdeng kane ka jingiakynad ki pulit ka Tripura ki la kyntu ia ki dkhot ka TSF bad ki Jaidbynriew riewlum ba kin phet noh na katei ka jaka hynrei ki Jaidbynriew riewlum ki la long ba kin ym mih na katei ka jaka katba ki Jaidbynriew bym dei riewlum kim pat leit.
Kane ka la pynbitar ia ki pulit bad ki la siat da ki lyer pynsat khmat bad ka um. Kane ka la pynlong ia ki Jaidbynriew riewlum ba kin ran kham shadien bad katba ki dang ran shadien ki pulit ki la tur shaba don ma ki bad ki Jaidbynriew bym dei trai shnong ki la tur lang nadien ki pulit ha ryngkat ka jingther maw ia ki riewlum. Ka jingleh jong ki pulit bad ki ka la pynkhluit ia ki riewlum bad ki la kawang maw kylla bad mih paidbah shuh shuh.
Hapdeng kane ka jingkynad ki pulit khlem da maham ki la synreit kuli beit beit ia ki Jaidbynriew riewlum kaba la poi shaduh u pud ba 10 ngut ki riewlum ki la mynsaw bad 5 ngut napdeng jong ki ki la shah siat da ki kuli. Dei hadien ka jingshah siat ba ki Jaidbynriew riewlum ki la phet sakma hapdeng ka jingshah kthong ha ki pulit. Ki pulit ki la rung sha ki shnong jong ki riewlum bad bom naphang ia ki paidbah.
Wat ha iing iap briew ruh ki pulit ki khlem mab shuh bad tied naphang ia ki nongwan sngewlem ha katei ka iing. Kaba kham sngewshyrkhei ka long ba haba la pynkit ia ki kiba la mynsaw da ka ambulance ban leit sha hospital ki pulit ki la kdong ha shiteng lynti bad bom naphang ia ki nongpang bad pynpait ia ka Ambulance. Ym tang kata, hynrei ki la phah ia ka Ambulance ban phai dien biang sha ka jaka ba ki wan. Hadien kane ka sorkar mar mar ka la pynjari da ka section 144 CrPC.
ha ka 10 tarik mynta u bnai ka NESO, KSU, TSF bad AASU ki la ioh ban leit peit bad sngap ia ka jingiathuh khana jong 4 ngut na kiba shah siat ha kaba la ioh jingtip ba uwei na uba la kham mynsaw jur la phah noh sha Kolkata ban ioh ka jingsumar kaba kham bniah. Mynne ka sngi pat haba ki nongialam jong kine ki saw seng ki la thmu ban leit sha ka hospital ha Khumlwng, Jirania Sub-Division, West Tripura kaba dei ka shnong jong ki riewlum la pynsangeh bad khang kdong noh da ki pulit jong ka jylla hapoh ka jingialam u Superintendent of Police ka West Tripura.
Ki pulit ki la iathuh ba la bthah da u myntri rangbah ka Jylla u Biplab Dey ban ym shah iano iano ruh ban ruh sha kito ki thain khamtam ia ki briew kiba nabar. Wat lada ki nongialam kine ki saw seng ki la ong ba kin shu leit peit ia ki briew ba shitom ha Khumlwng, hynrei u SP u khlem ai lad da kaba ong ba ka 144 CrPC ka treikam ha katei ka thain bad ym shah iano iano ruh ban rung sha katei ka jaka.
Kane ka pyni shai ba ka sorkar Tripura kam kwah ban pynpaw sha ka pyrthei ia ki kam bymman jong ka pyrshah ia ki rit paid riewlum bad ki seng ki sngewthuh ba ka don ka jingthombor ia ki riewlum ha baroh ki liang wat ha ka liang ka lad pathai khubor ruh ha kaba la ioh jingtip ba ki pulit ki la knieh ia ka ID card jong uwei u nongthoh kotkhubor u ba dei na ki Jaidbynriew riewlum.
Halor kane ka jingjia ka seng ka pynrem jur ia ka sorkar Tripura kaba pyndonkam da ki iktiar kiba long pyrshah ia ka riti synshar paidbah jong ka ri India bad ka seng ka pynrem jur ia ka jingshah siat jong ki paidbah Meetei kiba kynthup ia lai ngut ki samla pule bad kawei ka longkmie da ki kuli jri ha ki pulit Manipur mynne ka sngi ha nongbah Imphal.
Halor kane ka phang ka KSU ha ryngkat bad ki sengbhalang jong ka thain shatei lammihngi hapoh ka shatri jong ka NESO ki la rai ban pynlong da ka Black Flag day ha baroh ki nongbah jong ki jylla ka thain shatei lam mihngi ha kaba mynta ka sngi kum shibynta ban pyni ia ka jingpyrshah ia ka jingjia ha Tripura bad Manipur.
