Don aiu sha lyndet ba KHADC kim lum Dorbar Hima Mylliem mynta la bun snem

Shillong, Kyllalyngkot 08: U Bah John F Kharshiing, Chairman, Ka Dorbar Ki Khlieh Nongsynshar Ka Ri HynnieBah Johnwtrep, Spokesperson, Federation of Khasi States,

U la ong u dap da ka jingsngewkhia bad ka jingsngewsih halor ki kam kiba mih na ka jingpyniaid Hima Mylliem da ki bor KHADC, ha kaba u khun u hajar mynta da ki phew snem u shu sah ha ka umdum halor ka synshar khadar jong ka Hima namar ka jingbym plie lad ki bor KHADC ban lum ia ka Dorbar Hima. Kaei ka daw ba ki bor KHADC kim kwah Syiem ba pura hapoh ka Hima Mylliem.

Sa shisien u kyntu jur bad pynkynmaw ia u Bah PN Syiem, MDC, Chief Executive Member, KHADC bad khamtam ia ki MDC kiba hap hapoh u pud u sam ka Hima Mylliem, halor ka shithi kaba 11 tarik August 2015 bad 8 tarik March 2017 kaba la phah na ka Dorbar Federation of Khasi States, ha kaba la kyntu ia ki bor KHADC ban pynkut ia kine ki kam thung Acting Syiem bad ban pynbeit bad wanrah ia u Syiem uba pura, khnang ban ai ia ka hok jong u Khun u Hajar hapoh u pud u sam ka Hima Mylliem ban ioh ia ka Dorbar Hima Mylliem ha kaban ioh ia shim bynta ki khun ki hajar jong ka Hima bad ban ioh ia ka kaiphod kut snem jong ka Hima Mylliem katkum ka KHADC Mylliem Syiemship Act 2007 ha kaba la dei ban lum Dorbar Hima shisien shisnem.

Ha kawei ka liang baroh ki Dorbar Shnong, ki Dorbar Raid bad Dorbar Kur, ki lum Dorbar ha ryngkat ki khun ki hajar shisien shi snem bad ki ai ka jingkhien jingdiah hakhmat u khun u hajar katba ki bor KHADC ki khang bad set bad burieh ia ka dorbar kut snem jong ka Dorbar Hima Mylliem.

Ka Hima Mylliem ka long u klong snam jong ka Ri Khasi, ka lynti iaid ia kiba wan na shabar ka long lyngba ka Raid Marwet (khanapara-jorabad), bad u pud u sam u kut haduh Laitkor, ka sor bah Shillong, baroh kawei ka don hapoh u pud u sam ka Hima Mylliem.

Lada ki bor KHADC kim mon ban lum ban wanrah ia ka Dorbar Hima hakhmat u Khun u Hajar bad ban ai jingshai halor ka synshar khadar hapoh Hima Mylliem ka long ka jingleh kaba pynduh ia ka hok long briew jong ngi, bad ka long leh noh ei ka jingthaw ia ka Act /Rule Hima Mylliem 2007, 2008, bad 2015, bad ha kaba ki nongthaw Ain KHADC ki leh matlah kim don por ban pyrkhat lem ban wanrah biang ia ka hok u khun u hajar ha ka Dorbar Hima Mylliem.

U la  kyntu ia ki Dorbar Kur jong baroh 48 Myntri Hima Mylliem, katkum ka Act ba kin kyndit bynriew ban ia lum ia ka Dorbar Hima Mylliem ym ban shu ia khih ban ia pynkylla Acting Syiem namar u myllung soso tham u la iai ong “u syiem kam pher u maw ka Hima kit u rit u khraw”, ngi kyntu ia ki Dorbar Kur jong ki 48 kur Myntri ban lum ia ka Dorbar Hima hakhmat u khun u hajar.

La kyntu jur ia u CEM, KHADC bad ia ki MDC kiba don hapoh u pud u sam ka Hima Mylliem, ban ai jingshai balei ki khang lad bad pynduh ia ka hok jong ngi u khun u hajar ka Hima Mylliem ban ioh Dorbar Hima mynta la bun bun snem.

 

What Next?

Recent Articles

Leave a Reply

Submit Comment

*