Shillong, Lber 02: Ka Khasi Jaintia Christian Endeavour Union, kaba long ka seng ki Samla Khristan kaba kdup iaki Christian Endeavour Society bad C.E Union, hapoh ka Balang Presbyterian ha rilum Khasi Jaintia, ha ka Executive Committee jongka kaba la long ha ka 2.03.2017 ha iingmane Balang Presbyterian Mawkhar, ka pynpaw ka jingsngewkhia haduh katta katta halor ka jingjia kaba sngewsih kaba la jia myn ha ka 26 tarik ia ki parabangeit kiba na Nginiong, Mawbyrkong bad Nongbudum kiba dei na ka Myriaw Presbytery, ia kaba la shim ia kiba bun ki Mynsiem kiba kordor bad bun kiba mynsaw.
Ka KJCE Union ha ka Executive Committee kaba la long mynta ka sngi, da ka Mynsiem ka jingsngewsih lem bad kito kiba ha iing hasem kiba mad bad iakynduh ia kane ka jingjia, ka pynpaw ka jingsngewlem kaba naduh ka dohnud ia kiba haiing hasem kiba la duh noh iala U Kpa uba ieid jongki, ka Kmie ka nongsumar, ki Khun kiba ieid thep mynsiem, bad ruh kiba ieid ba thoin. Ka seng ka duwai ba U Blei un ai ka jingjahthait kaba bym jukut ia kito kiba ula khot noh shalade bad ruh ngin iai duwai ba kito baroh kiba Mynsaw kiba don ha ki Hospital ba U Blei un syrpud syrpai ba kin ioh ban mad iaka jingkoit jingkhiah.
Ka KJCE Union kum ka dak ka jingsngewkhia bad sngewsih lem halor kane ka jingjia kala pynlong iaka jingsngapjar kaba shi minit bad ka jingduwai na i Rev S.D Lanong bad ruh kan ai iaka jingiarap jongka sha ka Help Desk jongka KJP Synod Sepngi, Ia kane ka kyrwoh la pyllait paidbah da u Tbn. C Marsing, Mr A.L Gallong President bad General Secretary KJCE Union.
