Shillong, Naitung 09: U myntri rangbah jong ka jylla Meghalaya u Conrad K Sangma, haba kren ha ka jingialang kaba 67th ka North Eastern Council ka ban long ar sngi lynter kaba la sdang ha Shillong mynta ka sngi, u la ong ba ka jylla Meghalaya kan sa pdiang ia ka National Games 2022.
Ha kane ka jingialang u myntri rangbah u la ong ba ka jinglut na ka bynta kane ka National Games la antad ba kan poi sha ka T.1500 klur tyngka. Na ka liang jong ka sorkar jylla kala dep ban phah ia ki jingthoh sha ka sorkar pdeng lyngba ka DoNER Ministry bad ka NEC sha ka sorkar pdeng ban pan ia ka jingiarap na ka bynta kane ka kam. Ka jinglut kaba bun ka long ha kaba shna ia kiba bun ki jingdon kam na ka bynta ka National Games.
Ha kane ka jingialang u myntri rangbah u la ban jur ruh ban pynlong ia ka Umroi Airport ka jaka ba ki lieng suin A-320 ki lah ban hiar, u la ong ba ka NEC kala dep ban mang ia ka pisa T.178.38 klur ban pynheh ia ka, hynrei ki don jingeh bad kita ki jingeh ki long ha kaba pynjrong ia ka jaka hiar jong ka eroplane namar ki don ki dieng, ki iing briew ki lum kine ki jingeh ki dei kiba la kdew da ka Airport Authority jong ka Ri India.
Ban pynbeit ia kine ki jingeh kan shim por bad ka jinglut kaba bun, na ka liang jong u myntri rangbah ka jylla u la kyntu ia ka sorkar pdeng ban kan iarap ia ka sorkar jylla khang ban lah ban pynheh ia kane ka kad liengsuin kaba don ha ka jylla Meghalaya.
Kiwei ki jingdon kam kiba u myntri rangbah ka jylla u la buh ha khmat jong kane ka jingialang jong ka NEC, ka long ba u la kyntu ia ka NEC ba kan plie ia ka “Open School” na ka bynta ki khynnah kane ka jylla Meghalaya ha kaba ia kane ka skhim la dep ban phah sha ka NEC bad ka sorkar jylla ka kloi ban ai jaka.
U Myntri rangbah u pan ruh ban shna ia ka “Technology Park” ha New Shillong, ha ka jingkren u ong ba ka sorkar ka kwah ban khring ia ki briew ba kin wan ban bei pisa ha ka liang jong ki karkhna electronic bad technology ha kane ka jylla Meghalaya. U la kyntu ia ka sorkar pdeng bad ia ka NEC ba kin kyrshan ia kane ka jingthmu jong ka sorkar jylla.
Ka jingpyniasoh ka long kaba don kam ha ka ban kyntiew ia ka ioh ka kot jong kano kano ka jaka, la ka long ha ka liang ki surok, ki lynti na um, ki lynti rel, ki lynti suin, ki lad phah jingtip ki long kiba don kam ha kaba kyntiew ia ka ioh ka kot jong ki briew bd ban wanrah ruh ia ka jingia long kawei. U myntri rangbah u la ong ba la don kam ban pynheh ia ki lada phah jingtip ha kane ka thain baroh kawei bad ka sorkar pdeng ka dei ban peit ba ki internet ha kane ka thain kan long kaba biang.
U Myntri rangbah ka jylla u la kren ruh halor ki kam jngohkai pyrtthei, ka Act East Policy jong sorkar pdeng, ka jingsumar ia ki jingtei kiba la bei pisa da ka NEC, u la kren ruh halor ka jingpynduh noh ka sorkar pdeng ia ka skhim Non Lapsable Central Pool Recourses (NLCPR) bad ha ka jaka jong ka la wanrah ia ka North East Special Infrastructure Development Schemes (NESIDS). Ha kane ka jingialang u Conrad u la ong ruh ba ia ka jingmang pisa ia ka NEC dei ban pynkiew sha ka T.2000 klur.
