Shillong, Naitung 05: Ka kyrtong president kaba la pynieng da ka seng Congress bad ki liang pyrshah ka Meira Kumar kala wan poi ha Shillong mynta ka seng ban ia kynduh ia ki MLA ban pan jingkyrshan na ki ha kane ka Election President kaban sa long shen.
Haba kren ha ki MLA ha Annex Hall kaba don ha Ribong, u kala ong ba kane ka dei ka election president kaba nyngkong ba ia ka election la ia khun halor ka nongrim jong ka rukom pyrkhat pyrdain, kam pat juh jia ha kine election kiba la leit noh.
Kala ong ba balei kane ka jingkyrkhat ka wan, kane ka jingpyrkhat ka wan ka long ba ha dien ba la iohi ba ka Ri ka don ha kata ka jingeh ha kaba ia ka jinglong kaba khlem ia shah niam jong ka Ri kala sdang ban ktah bad kane ka buh ia ka Ri ha ka jingma, kala ong kum ka jingsngewpher jaid kynja, kala ktah ia ka hok u paidbah, ka jingialong kawei shitylli kaba baroh ki ieng ban pynneh pynsah ia ki hynrei mynta ka don hapdeng ka jingma, la ong ka Meira.
Na ka liang jong kane ka kyrtong president kala ong shuh shuh ba dei halor kane ka nongrim ba ki 17 tylli ki seng sain pyrthei kila ia wan lang kawei wat la ki don ka jingiapher ha ka rukom pyrkhat, hynrei ha kane ka liang ki ialang kawei ka jingmut ha kaba kila it bit ia ka ban long ka kyrtong ban ia khun ia kane ka kam president ha ka Ri bad kane ka election mynta ka dei ka election kaba ia dei bad ka jingmut jingpyrkhat.
Kala ong shuh shuh “ Ka Ri India ka dei ka ri kaba heh haduh katta katta, ha kaba ki don bun ki niam, ha kaba ki don bun ki jaidbynriew, ka rukom iam ki iapher, ka riti dustur ka iapher, kine kiba la pynlong ia ka Ri India bad ka jingitynnad jong ka, hynrei ngia im suk im sain bad kito kiba don ha ka bor kam jong ki ka long ban bat skhem ia kane ym ban pynthud ia ka”. La ong ka Meira.
Ka Meira ka la ong “hynrei mynta ki don ki dak ki shim kiba la lah ban pynshisha, ha kaba kala don ka jingpyrshang ban wanrah ia ka jingsngewpher jaid kynja, ban sdang ban bethah kumno ban bam, kumno ba hap ban ong, kumno dei ban leh, hynrei ki nongialam kila sdang ban jngai na ki paidbah, nga pang ban iohi ba balei haba ka sorkar kala don ia ka jingbun paid ha parliament bad ka bor kaba ki don ki pyrshang ban jngai ia lade ha kaba ym I don dak ha madan”.
Dei halor kane ka nongrim ba ia kane ka election la ia khun ha ka rukom pyrhat pyrdain dei na kane ka daw ba ki liang pyrshah ki ieng kawei ban ia khun ia kane ka election bad ka jingkyrpang jong kane ka kyrtong president ia ki nongjied president ba kin jied ia u ne ka president jong ka Ri da ka jingiatip lem.
Ia kane ka jingialang kaba lyngkot la plie da u Dr Mukul Sangma myntri rangbah ka jylla , la kren da u president ka MPCC u Dr DD Lapang, la don lang u nongialam ka liang pyrshah u Dr Donkupar Roy, ryngkat ki MLA u Dr Jemino Mawthoh ba du Bah T Chyne bad ki MLA shimet bad ki jong ka seng Congress.
