Shillong, Jylliew 09: U bah Paul Lyngdoh u myntri sorkar ba bat ia ka tnat Social Welfare u ba long ruh u MLA ka West Shillong konstitwensi ula kam ba ki jingjia pynkulmar kiba jia dang shen ha Mawprem ki dei na ka daw ka jingkiew palat ka jingkyrni drok hapoh ka thain bad ka nongbah Shillong baroh kawei.
Kumban shu pynkynmaw ba dang shen kila don ki jingjia shah pynjulor ia ki kali arshaka ha ki briew bym shym la ithuh durkhmat hapoh ka thain Mawprem.
Haba jubab ia kane u bah Paul ula ong “Nga la dep ïakren bad ki pulit bad ngin sa shong jingialang bad ka Dorbar Shnong ha ka jingdon lang ka tnad pulit ban tohkit halor kane ka mat”.
U bah Paul ula iathuh ba katkum ba la lum jingtip, kiba bun na ki nongkhaïi drok bad ki riew kyrni ki ju pynkulmar bad kynroi ïa kiwei pat ki nongkhaïi ne ki ba dih drok, kaba lam pat sha ka jinghuri hura ha lynti syngkien.
Ula ong, ka sorkar ka skhem jingmut ban shimkhia ia kane ka mat jong ka jingkyrni drok namar ka don iaka thong ban ratdyngkhong bad kum u MLA ka thain un iatreilang bad ki pulit ryngkat ki Dorbar Shnong ban ratdyngkhong ia u drok napoh ka thain bad ka jylla baroh kawei.
Nalor kane u bah Paul ula kyntu ruh ia ki nongshong shnong ba ki dei ban ujor beit sha ki pulit haba don kano kano ka jingsngew artatien lane shan khmat iano iano khamtam haka por mynmiet.
