Shillong, Lber 07: Ka Election ban jied ia u Speaker jong ka iing dorbar thawain ka jylla kan long ha ka 12 tarik mynta u bnai, kata ha ka sngi nyngkong ban wan.
Na ka liang jong u myntri rangbah ka jylla u Conrad K Sangma u la ong ba na ka liang synshar kila dep ban shim ia ka rai ban pyniakhun ia u Dr Donkupar Roy ha kane ka Election Speaker.
U nongialam ka liang pyrshah u Dr Mukul Sangma haba kren ha ki nongthoh khubor u la ong ba kin pynieng kyrtong ha kane ka Election Speaker, hynrei ia ka kyrteng kim pat rai namar da ki dang ia shong jingialang ban shim ia ka rai.
Ki thymmei khubor kiba ia jan bad ka seng Congress kila pynsngew ba kala don ka jingtyrwa ia ka kyrteng jong Winnerson D Sangma, hynrei ka kynhun jong ka liang pyrshah kim pat lah ban shim ia ka rai namar ba kin dang ia kynduh la shai ka sngi ban shim ia ka rai iano kin pynieng kum u kyrtong ban ia khun ia kane ka election speaker.
