Ka long kaba eh bha ban pynsngewthuh ia ki briew ban seng kam la jong: Dr Mukul

Shillong, Nohprah 13: U myntri rangbah u Dr Mukul Sangma haba jubab ia ka jingkylli jong u Dr Donkupar Roy haba ia dei bad ka Meghalaya Basin Development Authority, u mytnri rangbah u la ong ba ka jingthmu jong ka, ka long ban hikai ia ki briew ban sngew ia ki kam ki jam la jong bad ka long kaba eh bha ban pynsngewthuh ia ki briew ban seng kam la jong.

U myntri rangbah u la iathuh hapoh ka iing dorbar ba baroh ki nongtrei hapoh jong kane ka MBDA baroh ki don 357 ngut, bad ka jingdon jong ki nongai jingmut baroh ki don 23 tylli , ka jinglut ha kaba siew ia ki nongtrei ka long  T.17.02 klur bad na ka bynta ki nongaijingmut ka long T.9.07 klur bad roh ia kine ki nongtrei la shut hung kontrok. Ki don ki ophisar kiba la shuh phah na ki tnad sorkar.

U myntri rangbah u la ong ba lada yn lah ban hikai ia ki briew ba kin seng iala ki jong ki kam ki jam, kan long ka jingeh kaba khraw ia ka jylla namar baroh ia tip ba ki kam sorkar kila nang duna katba nang mih ki sngi. U myntri rangbah u la ong ba da ka jingdon jong kane ka MBDA, mynta bun bah ki skhim kila sdang ban wan la ka long na ka sorkar pdeng ne na ki seng bei pisa kiba dei na ka sorkar jylla Ri.

U Myntri bad dei ia ka tnad khyndew u Dr RC Laloo haba jubab ia ka jingkylli jong u Dr Jemino Mawthoh la ka sorkar ka don jingthmu ne em ban pynduna ia ka bai register khydnew ia kiba don ha khappud, na ka liang jong u myntri u la jubab ba haduh mynta ka sorkar kam pat don kata ka jingpyrkhat ban pynduna ia ka bai register khyndew.

Hynrei na ka liang jong u myntri u la iathuh hapoh ka iing dorbar ba ka don ka jingapher haba register ia ki jaka ha pdeng ki riewlum bad ki bym dei riewlum ka jingiapher ka long mar shiteng bad ka sorkar haduh mynta ka but ia ka Indian Registration Act 1908 jong ka sorkar pdeng.

Haba jubab pat ia ka jingkylli ban ia shai, hato ka dei ka District Council ne ka sorkar jylla kaba don ia ka bor ban register katkum ka ain, na ka liang jong u myntri u Dr Laloo u la ong ba ka sorkar kan sa peit ia kane ka bynta ban ioh ia ka jingshai kaba thikna.

What Next?

Recent Articles

Leave a Reply

Submit Comment

*