Shillong, Jylliew 06: Ka KSU ka sngew ban kdew bad pynrem iaka jingkam u Deputy Commisioner ka Ri-Bhoi district ba ki pulit kim shym la nion ia ki dkhot ka seng khamtam hapoh district hi baroh kawei, Kane ka jingkren u DC ka long kaei kaei kaba long mar khongpong bad ka jingleh ki pulit ka Ri Bhoi district hi, namar lah nion lah thwet ia ki dkhot bad ki nongialam jong ka seng lah i kumba ki dei ki lehnoh ryngkat ki kyntien pyntieng pynsmiej wat ia kiba ha iing ha sem jong ki dkhot.
Na ka liang jong ka seng KSU ka kam ba ka lah don ruh ka jingtyrwa song pisa ia kino kino kiba ai jingtip iaka jaka ba don ki dkhot jong ka seng, hato kata jingleh kam dei mo ka jing nion bad jingthombor? Ka seng kam don kano kano ka mat bad ki pulit hynrei ka KSU buh ka jingkylli balei hap ban pyntieng pynsmiej ia kiba ha iing ha sem ki dkhot, balei ki dkhot ka seng ki dei ki nongshun jong ki pulit? To tip ka KSU kam shym la pyndik satia ia kiba ha iing ha sem jong ki pulit, wat sdang ban aiding bad ban shu nion wat la phi don ha ka ain ryngkat bad ki tiar ialeh, namar kim pat shym lah kieng atiar satia ki dang pyndonkam tang da u khulom, ka sur bad ki kyntien.
Kumba ka jia kumba ka long mynta la khynra ia ki dkhot jong ka seng la palat ban iaka jingkhynra lehnoh ha kaba wat ia ka iing ki para ri ha Umbir la shu kynjat ban pynpra wat iaka jingkhang iing ruh, kane ka paw shai iaka jingleh riewkhlaw ki pulit tangba ki don ia ka ain ha ka kti, “kynmaw ngim dei ki nongwei hynrei kane ka dei ka ri u paid Khasi ba iar bad ngi dei ki dkhot jong ka jaitbynriew bad ngi ieng halor ka nongrim ban iada iala ka jong ka jaitbynriew bad kiei kiei baroh kiba jia kim shym lah pynkynran dien iaka ka nongrim kaba ngi ieng da ka long ha kano kano ka dur ruh ngin iai pynsawa tang da kawei ka sur ban pyrshah lynti rel namar ia mynta ka jingrung jingmih ki briew ba nabar ka long laitluid bad laitlan khlem kino kino ki jingteh ki jingkhum kiba biang ban iada iaka jing long ba kyrpang jong ka jaitbynriew”.
Ka seng KSU ka sngew ban kren daka ba shai sha ka sorkar ba um dei u Deputy Commisioner ka Ri-Bhoi district bad ka North-east Frontier Railways ki ban rai ia jingpdiang lynti rel, la thung ia u (DC) kum u shakri ban peit iaka jingdonkam ki nongshong shnong hapoh district ym ba ma u un pynrai iaka lynti rel, ha ka juh ka por ka seng ka sngew ban ong ba ka NFR ka pynkhein wat ia ki ain jong ka jylla, haba wat tang ka Work Permit ki nongtrei lynti rel kim don. Ka Work Permit ka dei ka ain ba lah pynskhem daka sorkar jylla hynrei lada kiba wan kim niew ia kata ka ain hato kan don jingmut aiu ban ia kren iaka ain bad hato kata ka ain ka trei kam tang ia ngi ki trai ri ki trai muluk?, bad ym tang kata wat ka No Objection Certificate napoh ka Khasi Autonomous District Council ruh ym pat shym la ioh satia haduh mynta hato kata ka NFR ka dei ka khun khatduh jongno ban ong ba kan iaid laitluid bad leh katba ka mon ha ka kam ka jong ka.
Da kaba shai lyngba kane ka kyrwoh ka seng kan ieng skhem beit triang ban pyrshah lynti rel wat hapdeng ki jingshah thombor shah kynnoh bad shah pharep ba laiphewjait ha ki bor jong ka ain. Lada u DC u kloi ban pynbiang jingpahara ia ki nongtrei lynti balei um phah phara sha khappud kiba ju jia ki jing shah thombor ki pari ha ki briew kiba nabar bad ki kynhun lehnoh kiba ju wan dawa pisa na man lah ki thliew iing. Sngewsih lane sngewthamula pynban ban iohi ba une u DC u kop ban un lah ban wanrah ia ka suk ka sain ha Ri Bhoi district da kaba kem naphang ia ki samla Khasi khamtam ia ki dkhot ka KSU.
Ka seng ka buh jingkylli hato u DC haduh katno eh u la wanrah iaka shongsuk shongsain ha kane district? Hato u DC lem bad ka administration ka jong u ka la ioh kem lut mo ia ki bar jylla kiba thombor ia ka Weigh bridge, ka ophis DMR bad Sales Tax ha Byrnihat ha kine ki bnai ba la leit? Hato dei nabar ba la tbit palat ban wanrah shongsuk shongsain u DC ha Ri-Bhoi ba sa shah ther maw lut ki kali ba don nombar ML05 kynthup ia ka kali u nongialam ka liang pyrshah ha Byrnihat? Hato u DC u la lah ban tehlakam da kaba kem lut ia kine ki nongthombor ha khappud kiba pynwit man ka por ia ka iaid ka ieng ki nong Meghalaya? .
Naduh ba u bat kum u Deputy Commisioner ka Ri Bhoi district, aiu u la leh na ka bynta ka shongsuk shongsain ki briew ha khappud? Hato u la ai jingiada ia ki nongshong shnong ha khappud Assam? Lane ka shongsuk shongsain ha u ka dei ban thombor ia ki jaidbynriew Khasi bad ban ai lad ia ki briew nabar ba kin wan thang, wan lun maw katba mon ha jylla jong ngi? Kumba ka paw shai mynta ka shongsuk shongsain une u DC ka mut kumta.
ka seng ka buh ruh ka jing kylli kiei kita ki nongtrei lynti rel kiba hap ban da pynbiang nongpahara ,balei ki long kyrpang haduh katno ne u DC u ioh bhah eiei na ka NFR ba un shim khia ban pynbiang bor pahara?, u pynbiang bor pahara ia ki nongtrei lynti rel hynrei u nion pat ia ki dkhot ka seng kiba dei ki dkhot ka jaitbynriew, kane ka kren shai kdar ba u DC hi u kwah bad u thrang ban wanrah ka jingiaumsnam sngewpher jaitbynriew bad ym dei mano mano ba sdang hynrei u DC ribhoi u sdang iakaba kum kata ka lynti.
Ka seng ka kren da kaba shai iaka NFR ba ynnai wan pynkhluid ia kane ka kam bad ynnai kynshoit da kaba pyrshang ban rieh tngen ha ki bor pahara ba kular u DC , namar ma u um lah ban pynrai iaka mon jong ka jaitbynriew. NFR klet shwa iaka wan shna lynti rel katba ka jaitbynriew kam pat pdiang khie leit shna sha kiwei ki jylla bad nai wan kyntur shi kyntur hapoh u pud u sam jong ka Bri U Hynniewtrep namar ngim pat pdiang.
Kyntang ia wai ngin iai ban bad pynshai kdar ba ka jingkynnoh bad ka jingkem ia ki dkhot ka seng kam dei ka jingkut jong ka jingialeh, hynrei kadei ka jingsdang ka ban sa jur shuh shuh nangne sha khmat bad ka seng kan nym shim kano kano ka jingbah khlieh lada mih ki kynrum kynram ha kylleng ka Bri U Hynniewtrep. Ong u samla Lambok S Marngar president ka Khasi Students, Uion.
