Tura, Nailar 28:U myntri rangbah jong ka jylla u Dr . Mukul Sangma, u la ong ba kan nym don kano kano ruh ka jaidbynriew kaba lah ban im marwei, ia kane u la kren ha ka jingialang ban rakhe ia ka jingdap 100 snem ka sngi iap jong u Sonaram Rongrokgre Sangma bam kwai ha dwar u blei, ha Bakrapur jong ka Golpara District Assam, ia kane ka jingialang la pynlong da ka GSU.
Ha ka jingkren jong u myntri rangbah u la kyntu ba “ Ngi dei ban peit ia kaei kaba la long la man mynshuwa ia kaba ki nongialam ki la prat lynti ia kaba bha, ha ka juh ka por ban hikai ia ki samla kane ka juk kaba mynta bakin kiar na ki jinghikai bad kijingmut jingpyrkhat ba sniew, u Dr Mukul la pynkynmaw ba u Sonaram Rongrokgre Sangma, u dei u riew khraw napdeng ki nongsain pyrthei jong ka jaidbynriew Garo , u riewshlur bad u nongialeh laitluid jong ka Ri.
Kane ka long ka sien kaba nyngkong ia u Dr Mukul ban ia shim bynta ha kane ka jingrakhe ia ka sngi iap jong u Sonaram Rongrokgre Sangma, ha kane ka sngi na ka liang jong u myntri rangbah u la ong, ba u tei u nongialam, ha katei ka por u la len lade da kaba iehnoh ia ka kam ban ia khun pyrshah ia ki dohlieh khlem da ia umsnam. Ha kane ka juk kaba mynta lei ym don kam ban da ia umsnam ban pynsngew ia ki jingeh kaba don.
Haka juh ka por u la ong ba “ haba ngi ieit ia ka jaidbynriew la jong, ngi dei ban ieit ruh ia ki wei para jaidbynriew, kan nym don kano kano ruh ka jaidbynriew kaba lah ban im marwei, ngi lah ban kiew tang lada ngi imlang bad kiwei”.
Haba ia dei bad ki jingeh kaba ki paid Garo kiba don hapoh jong ka jylla Assam ki ia kynduh, kane ka long ka juh iakito kiba don ha ka wei ka liang ruh, u la kyntu ban bud ia ki nongialam kiba mynshwa ban im ha ki jingshisha bad lah ban kiew lada leh kumta.
Ha kane ka sngi u myntri rangbah u la pynlait ruh ia ka kot sah kynmaw ia kaba la ai kyrteng ka “Jachri” kaba la pynmih ban kynmaw burom ia kane ka sngi, ha kaba u myntri rangbah u la ong ba don kam ban bihsar bniah ia ki jingthoh ban nym ialam bakla ia ki samla. Ha kane ka sngi la pynlait ruh ia ka kot kaba la thoh da u Dr. Milton Sangma, u Pro-VC , NEHU bad jong ka ICFAI, ia kane ka kot la ai kyrteng “The Mongoloid Invasion of South Goalpara” , Kawei pat ka kot kaba la pynlait lang ha kane ka sngi ka dei kaba la ai kyrteng “Political Movement of Sonaram R. Sangma and its impact upon the Garo Society” kaba la thoh da u Dr. Tharsush K. Sangma.
Kiwei kiba la kren ki long u MP ka Tura, u Conrad K. Sangma, u MLA jong ka Bokajan, Assam, Numal G. Momin , kiwei kiba la ia don lang ki long u, Cherak W. Momin, Brigady N Marak, Samuel M. Sangma bad u Michael T. Sangma, u, Chief Executive Member, GHADC u Denang T. Sangma, bad kiwei ki para MDC.
U Sonaram R Sangma, ha katei ka por u la lum la lang ia ki paid Garo kiba don ha Goalpara districts kaba dei hapoh ka jylla Assam ban ia khun pyrshah ia ki dohlieh khlem da ia umsnam, u nla dei u nongsain hima u ba nymkong na pdeng ki Garo , u la iap ha ka 27 tarik Nailar 1916 la tep ia u ha Bakrapur lumjingtep jong ki khristan bad kane ka jaka mynta ka hap hapoh jong ka jylla Assam.
