Shillong, Naitung 1
8: U myntri rangbah ka jylla u Dr Mukul Sangma mynta ka sngi ula plie ia ka Mawpat Community and Rural Development ha ka jingiadonlang u myntri ba dei peit ia ki kam pynroi nongkyndong u bah Sniawbhalang Dhar,u myntri pynroi sor u bah Ronnie V Lyngdoh MLA, Pynthorumkhrah u bah A.L Hek, MLA, Nongthymmai, Dr Jemino Mawthoh u MLA ka Mawlai u bah Embhahlang Syiemlieh bad u MLA, Mawryngkhneng,u bah David Nongrum. U myntri rangbah ula pynpaw ia ka jingsngew kmen ba ula ioh ban plie ia kane ka block kaba 45 ha ka jylla.
Ha ka jingkren u myntri rangbah ula ong ba ki C&RD Block ka dei ka pdeng ka roi ka par kaba ka sorkar ka pyntrei ia ki skhim pynroi ha ka jylla, kino kino ki skhim kiba ka sorkar ka pyniaid ka long lyngba ki block. U la ong ba ka sorkar kala pyrkhat ban wad ki lad ki lynti ba kumno ia ki kam pynroi yn lah ban pynpoi sha baroh ki paidbah ha ki dong bad ki jaka bapher bapher. Ka jingplie ia kane ka block mynta ka sngi ka long ka jingsdang jong ka roi ka par jong ka thain ha ki snem kiba dang wan.
Ha kane ka jingialang u myntri rangbah u la kren shai kdar ba ia kino kino ki jingeh kiba ka jylla ka ia kynduh ka sorkar kan sa leh ia kaba donkam khnang ba ki paid nongshong shnong kin ym shah ieh bein bad ba kin nym duh ia ka hok ba dei trai ka jong ki. U la ong ka roi ka par ka don ka jingiadei kaba jan bad ka shongsuk shongsain, ula kyntu ia ki paidbah ba kin ai ka kti ka mon ka kti ka kti ka diang ia ka sorkar na ka byntaban dup lah ban wanrah ia ki kam pynroi ha ka jylla.
Ha kane ka jingialang u Dr Mukul ula ban jur ba donkam ban peit ia ki khun samla ban plie ia ki lad ki lynti ha ka pule puthi khnang ba ynda kila dep ia ka jingpule jong ki kin dup lah ban ieng ha la ki jong ki kjat bad ba kin nym mih na la ka jylla ban leit sha kiwei pat ki jylla ban wad kam wad jam lane ha ka pule ka dangle. Ia ka Mawpat C&RD Block la phiah na ka Mylliem Block bad kane ka block bathymmai kan ai jing shakri ia ki lai tylli ki constituency, ka Pynthorumkhrah, ka Nongthymmai bad ka Mawryngkneng.
Ia ka jaka ban shna ia ka block la ai ei da ka mawpat pyllun bad kane ka block kan treikam noh naduh mynta ka sngi ba la plie ia ka. Da ka jingdon jong kane ka block kan iarap shibun eh ia ki paidbah ha kiba bun ki liang na ka bynta ka jingdonkam jong kaba man la ka sngi. Ha kane ka sngi u myntri rangbah ula buh ia u maw nongrim ban shna ia ka ophis ba pura jong ka block.
Ka I.R Sangma kala pule ia ka jingpynbna sorkar ha kaba ia dei bad kane ka block bathymmai, kiwei ba la kren ha kane ka jingialang ki long u bah Sniawbhalang Dhar, u bah R V Lyngdoh MLA, Nongthymmai Dr Jemino Mawthoh, MLA, Mawryngkhneng, David Nongrum, MLA ka Mawlai bah Embhahlang Syiemlieh, u chief secretary u Y Tsering, u DC ka East Khasi Hills u bah P.S Dkhar ia ka jingialang la pyniaid da u bah A.L Hek MLA Pynthorumkhrah.
