New Delhi, Risaw 03: U MP jong ka Tura sha ka Lok Sabha mynta ka sngi u la ia kynduh ia ka kynthung jong ki rangialehkai jong ka Ri India ki ban mih khmat ia ka Ri India ha ka Under-17 FIFA World Cup 2017.
Ha ka jingkren jong u Conrad K Sangma bad ki rangialehkai jong ka Ri ka kynhun kaba 21 ngut, u la ong ba u dap ka jingkmen ban iohi ba ha kane ka kynhun ki don haduh 21 ngut ki samla na ka dong shatei lam mih ngi jong ka Ri India kiba la shah jied ha kane ka kynhun ia lehkai.
Da kane ka jingshah jied jong kine ki phra ngut ki rangialehkai na ka liang jong u Conrad u la ong ba ka dong shatei lam mih ngi jong ka Ri India ka dei shisha ka jaka pynmih ia ki rang ialehkai ha ka Ri. U la ong ba ki samla kane ka thain ki don ia ka sap ka phong ka jong ki bad kane ka dei ka lad ba kin pynisha ka pyrthei.
U la ai khublei ia ki nongialam jong ka sorkar pdeng bad kum juh ia ki jylla na ka bynta ka jingshah jied jong kine ki phra ngut ki samla kane ka thain, u la ong ba kane ka dong bad ka thain ka don kam ia ki jaka ia lehkai kiba biang. Kumba ka long mynta ka Guwahati ka dei ka nongbah jong ki jingialehkai jong ka Ri. Kumba ka long ka Dong shatei lam mih ngi ka dei ka nuksa ia kiwei ha ka jingialehkai khamtam ha ka jingiakynjat ball, la ong u Conrad.
