Shillong, Jymmang 01: U myntri rangbah ka jylla u Conrad K Sangma, ryngkat bad u symbut myntri rangbah u bah Prestone Tynsong mynta ka sngi kila ia kynduh ia u Nitin Gadkari myntri ka sorkar pdeng ba dei peit ia ki kam shna surok ha ka Ri.
Ha kane ka jingiakynduh kila ia kren halor ki surok kiba dang sah teng ia kiba dang dei ban pyndep ha kane ka jylla. Ha kane ka jingiakren na ka liang jong u myntri ka sorkar pdeng u la ai ka jingkular ba ka sorkar pdeng kan ia ka jingkyrshan ia ka sorkar jylla na ka bynta ban shna ia ki surok ha kane ka jylla.
Ha kane ka jingiakynduh kaba mynta ka sngi la don lang ki heh jong ka NHIDCL bad jong ka NHAI , ha kane ka sngi la ia kren ia ki surok na Tura sha Dalu, sha Baghmara, na Moheshkola sha Ranikor , ka NH-62 bad ka Shillong Dawki.
Ha kane ka jingialang na ka liang jong u myntri rangbah ka jylla u la pynsngew ruh sha u myntri jong ka sorkar pdeng ba ia ki jingkieng dieng kiba dang don ha kane ka jylla ka sorkar ka kwah ban shna noh da ki jingkieng dewbilat. Halor kane na ka liang jong u myntri ka sorkar pdeng u la kular ban ai ka jingkyrshan.
Na ka liang jong u myntri ka sorkar pdeng u la iathuh ba kan don ka jingialang ha Shillong ha ka 25 bad 26 tarik mynta u bnai ban ia kren ha pdeng ki heh jong ka tnad shna surok jong ka sorkar pdeng bad jong ka sorkar jylla ba kumno ban pyniaid ia ki jingtrei ha kaba ia dei bad ki surok sha khmat ha kane ka jylla.
