Shillong, Jymmang 18: Ka Meghalaya Pradesh Congress Committee (MPCC) ryngkat bad kiwei ki shnat jong ka seng ha baroh ki jylla jong ka Ri India mynta ka sngi kila pynlong ia ki jingiakhih ha ophis jong ka party Congress ban pyrshah ia ka jingleh jong ka BJP hapoh Karnataka ha kaba u Lat jong katei ka jylla u la khot ia ka BJP ban thaw sorkar ha ka jylla.
Haba kren ha ka jingialang u president jong ka MPCC u Dr Celestine Lyngdoh, u la kynnoh ba ka BJP kala leh donbor ha Karnataka bad dei na kata ka daw ba ha baroh kawei jong ka Ri India ka seng Congress mynta ka sngi kala pynlong ia kane ka jingpyrshah ia ka jingleh don bor ka seng BJP bad kane ka jingleh ka long ba la iuhroit ia ka synshar paidbah ha kane ka Ri India da kawei ka party.
Ha ka jingkren ka kong Amapreen Lyngdoh MLA jong ka Shillong East kala ong ba ka iing bishar ba ha khliehduh jong ka Ri India kala pynmih mynta ka sngi ia ka hukum ba ka sorkar BJP ha Karnata ka dei ban pynshisha ia ka jingbun paid hapoh ka iing dorbar la shai ka sngi ha ka por ar baje noh phai sngi.
Kala ong ba ha ka jingshisha haba kam don kano kano ka party kaba ioh ia ka jingbun paid ban synshar marwei, na ka liang ka jong u Lat u la dei ban khot ia ka kynhun kaba don ka jingbun paid. Ka kong Ampareen kala ong ba ha katei ka jylla ka party Congress, ka party JDS bad ki dkhot shimet kila don ia ka jingbun paid hynrei u Lat u la khot ia ka BJP ban thaw sorkar bad kane ka long ka jingiuhroit ia ka synshar paidbah kala kynnoh.
Ha kane ka sngi nalor u president jong ka MPCC, kiba la ia don lang ha ka jingiakhih ha Congress Bhavan Thana Road, la ong lang u Bah HM Shangpliang MLA jong ka Mawsynra, bad kiwei kiwei ki nongialam jong ka seng naduh ka seng kynthei, ka seng samla jong ka party Congress. Ha kane ka jingiakhih la pynbna ba ka Congress kan ai a ka dorkhas sha u Lat jong ka jylla ban pynpoi sha u President jong ka Ri India.
