Shillong, Naitung 07: U MLA jong ka 19th Shillong South u Bah Sanbor Shullai u la thoh sha u myntri rangbah ka jylla u Conrad K Sangma ha ka kyrteng jong ki long iing kiba duk kiba dei ban ioh ia ka skhim Chief Minister’s Social Assistance Programme (CMSAP) kaba dei ia ki riew kynthei kiba anna bad ki ba duk.
Ha ka shithi kaba u la thoh na ka liang jong u Bah Sanbor u la ong ba kane ka skhim CMSAP ka dei ka jingiarap kaba dei ban siew man u bnai sha ki long iing kiba duk kiba la kdew haneng hynrei mynta la khatsan bnai ka sorkar kam shym la siew ia kane ka pisa kaba dei jong kiba duk.
U Bah Sanbor u la ai ruh ka jingkhein ba baroh kiba dei ban ioh ia kane ka skhim ki long 99,552 ngut ha ka jylla baroh akwei, kidei dei ki riew tynmen ki long 53,573. Ki long kmie bym don kurim shuh ki long 30,284, kiba anna ki long 11,695 ngur. Na ka liang jong u tei u MLA u la kyntu ia u myntri rangbah ba ka sorkar kan siew noh ia ka pisa ka jong ki.
Ha ka juh ka por na ka liang jong u MLA u la kyntu ia u myntri rangbah ka jylla ba ka sorkar ka dei ban pynkiew noh ia kane ka skhim sorkar na ka T.500/- tyngka kaba ka siew mynta man u bnai sha ka T.2000/- tyngka man u bnai namar kine ki dei ki briew kiba duk ba rangli jong ka jylla.
