Guwahati, Nailar 21: U M Sreenivasulu, Director jong ka Micro, Small bad Medium Enterprise- Development Institute, Guwahati u la ong ba ka sorkar India ka la mang kumba T. 1000 klur ban pyntreikam ia ki skhim bapher bapher jong ka Micro Small and Medium Enterprise (MSME) na ka bynta ka thain shatei lammihngi jong une u snem mang tyngka.
Haba ai jingkren sha ka jingialang bad ki lad pathai khubor ha ka phyllaw jong kane ka institute mynta ka sngi, u Sreenivasulu u la pyntip ba ki MSME mynta ki don ha baroh ki jylla bad ki Union Territory bad kalong kaba ar ha ka jinglah ban ai kam ai jam hadien ka rep ka riang ha ka ri.
U Sreenivasulu u la ong ba wat hapdeng ki scheme bapher bapher na ka bynta ka bha ka miat ba la pyniaid da ka Ministry of MSME, la lap ba ka don ka jingduna jingtip shaphang kine ki scheme naduh na trai bad dei namar kane ki jingmang jingiarap na ka sorkar India kam shym la poi sha ka kynhun ba la buh thong ban poi.
Ka jingthmu jong ka jingialang bad ki lad pathai khubor ka long ban pynsngewthuh ia ki briew ia ki scheme bad ki jingmyntoi ba la ai da ka sorkar India lyngba ka Ministry of MSME, khnang ba kin nang briew shuh shuh ki briew ki ban ioh ia ki jingmyntoi jong ki scheme.
ki scheme bapher bapher jong ka Ministry of MSME, sorkar India ban pynshlur ia ki samla khlem kam khlem jam ban ieng ha la ki jong ki kjat kumjuh ruh ban kyntiew ia ka bynta jong ka MSME ha ka thain. Ki thong ba hakhmat eh jong ki scheme kalong ban weng ia ka jingduk jingkyrduh bad ka ioh kam ioh jam da kaba seng ia ki karkhana rit, ki kam khaii pateng.
Ka don jingthmu ruh ban kyntiew ia ki MSME Unit ba la don lypa ban nang pynkhlain shuh shuh ia ki jingmyntoi na ka bynta ka ri kiba lah ban wanrah ia ka jingkiew jong ka GDP (Gross Domestic Product) bad ka jingiohnong na ka jingshalan ia ki tiar sha kiwei pat ki ri.
U Sreenivasulu u la kren shaphang ki scheme pynroi bapher bapher jong ki MSME kiba la shna ha kata ka rukom ban wanrah ka jingkiew ka roi ka par ha kylleng ka ri kaba ryntih khnang ban ialeh pyrshah ia ka jingsahdien ka thain shatei lammihng. U la ong ruh ba ki scheme jong ka Ministry kidei ki scheme na ka sorkar pdeng ha kaba la buh ka percentage jong ka jingmang pisa kyrpang sha ki SC, ST bad ki briew ha ka thain shatei lammihngi.
U Sreenivasulu u la batai kyrpang ia ki scheme kum ka Credit Guarantee Fund Scheme (CGFS) bad ka Prime Minister’s Employment Generation Programme (PMEGP). U la pyntip ba hapoh ka CGFS, la ai ram sha ki MSE kaba iarap ha ka ban seng kam seng jam. Katba u la kam ba ka PMEGP kalong ka prokram kaba jop jong ka sorkar, u director u la ong ba ka PMEGP kadei kaba ai subsidy khnang ban plie lad ban seng kam lajong lyngba ka jingsdang ia ki kam barit baria ki bym don jingiadei bad ki kam ri jingri, da kaba iarap ia ki nongshna tiar tynrai bad ki samla khlem kam.
U director, haba ai jingkren shaphang ka Cluster Development Programme (MSE-CDP), u la ong ba ka sorkar pdeng ym tang ba ka ai jingiarap pisa sha ki kynhun hynrei ka ai jingiarap ha ki jingdonkam kum ka ban seng ia ki common facility centre (CFC), ki jaka buh tiar, ki jaka saindur, ki jaka pyrshang ia ki tiar, ki jaka ai jinghikai bad ki jaka wad bniah bad pynbha .
U Sreenivasulu u la pynkut ia ka jingkren jong u da ka jingkyrmen ba kum kane ka jingialang bad ki lad pathai khubor kan iarap ban pynsapriang jingtip hapdeng kiba bun balang shaphang ki skhim bad ki prokram bad kin nang bun ki nongseng kam lajong ban wan shakhmat ban shim ia kine ki jingmyntoi na ki skhim jong ka sorkar hapoh ka Ministry of Micro Small and Medium Enterprise.
Lah ban kdew ruh hangne ba ia ka Micro, Small bad Medium Enterprise- Development Institute, Guwahati, la seng ha u snem 1958, ban kyntiew ia ki karkana rit ha ki jylla jong ka Assam, Meghalaya bad Arunachal Pradesh lyngba 6 tylli ki shnat trei kam kiba don ha Tezpur, Silchar, Diphu, Itanagar, Shillong bad Tura.
