Shillong, Jymmang 16: u Prof. S. S. Majaw ha ka jingïalang kaba la long u kongsan u la pynlait paidbah ïa ka kot kaba la ai kyrteng “Ki Symbai Ka Niam Khasi Tynrai” ia kane ka kot la thoh da ki khatar ngut ki riew rangbah.
Ia kane ka kot ka dei kaba la thoh da ki khatar ngut ki nongthoh bapher bapher kiba don ka jingtbit bad jingsngewtynnat halor ki phang ba ki la thoh. U Kongsan u la ai ka jingïaroh ïa kine ki rangbah kiba la kloi ban noh synñiang sha kane ka thup kaba la pynbit pynbiang da ki Editor, bah A. W. Rani bad bah K. G. Diengdoh.
Dei da ka jinglong la kloi jong kine ki rangbah kynthup naduh ki pastor, ki nonghikai bad kiwei ki bym shym la tyngkai na ka bynta ka jingmyntoi jong ki nongpule jong ka pateng ba mynta bad ban sa wan.
Shuh shuh ha kane ka kot ki don 13 tylli ki jingthoh kiba dei ha ki phang bapher bapher ba ki nongthoh ki la wanrah hadien ka jingwadbniah jong ki. Khlem artatien kane kan long ka jingïarap ban nang pynroi pynsan ïa ka thoh ka tar bad ka pule puthi jong ka jaidbynriew.
