Shillong, Rymphang 14: Ki Nongialam jong ka Hynniewtrep Youths’ Council Sengkmie ha ryngkat ka jingsynran lang ki Nongkitkam ka Jaintia Hills District, myn ha ka 13 tarik mynta u bnai ka la hiar sha ka Shnong Thangrain, West Jaintia Hills District ban pynskhem ia ka Shnat treikam kaba thymmai jong ka ia kaba lah tip kum ka HYC Elaka Shiliang Myntang Area Unit ha kaba palat 60 ngut tam ki samla shynrang bad kynthei jong kane ka Thain ki lah wan ban pyniasoh ialade bad ka Seng.
Ia ka Jingialang pyntian smai bad pynskhem ia kane ka Unit ba thymmai jong ka Seng lah pynlong ha u Lum Lapudia, Nongrim Ing jong ka Syiem Lapasam, ha ka Shnong Thangrain, West Jaintia Hills District.
Ha shuwa ban ioh ia ka jingpynbam smai bad shim ia ki kyntien kular da ki dkhot ba thymmai jong kane ka Unit, lah ioh ban pynlong ia ka jingialang ba lyngkot ha kaba ia ka jingialang lah pyniaid da U Samla Rangbah Francis Gee Mawlong, Organising Secretary CEC.
La ioh ka jingkren lamphang na u President ka Jaintia Hills District u Samla Mewathi Suchiang bad pynbud sa ka jingkren na u Samla Preios Pale uba long u President ka East Jaintia Hills Circle. Na ka liang u Samla Rangbah Rockesstar Warjri, Asst Organising Secretary ka CEC uba long ha kajuh ka por u In-charge ka Jaintia Hills District ruh lah ai jingkren ha kane ka prokram.
Ia ka bynta ba kongsan ban pyntian smai bad pynskhem ia ki dkhot ba thymmai jong kane ka Unit lah shim da u Nongialam Rangbah ka Seng u Samla Rangbah Roy Kupar Synrem, General Secretary CEC, uba lah ai ruh ia ki kyntien kyntu kynpham bad pynshai ia ki Nongrim treikam jong ka Seng bad khot wer ia kine ki dkhot ba kin mih shakhmat kum ki Shipai jong ka Jaidbynriew ha man ki khep ba ka Seng bad ka Jaidbynriew ka donkam ia ki.
La aiti ia ka Riti Treikam, ka Lama bad kiwei ki jingdonkam jong kane ka Unit ba thymmai da u General Secretary ka Jaintia Hills District Samla Romingstar Lamare. Ha kane ka sngi la ia don ryngkat ruh u Samla Issac Basaiawmoit, Asst G.S la HYC CEC, U Samla Arki Lamare, G.S Ka East Jaintia Hills Circle lem bad ki dkhot bad kumjuh ruh ki Nongialam ka HYC ka Laskein Circle.
Ki nongkitkam jong kane ka Unit ba thymmai ki kynthup ia u Samla Pynroi Shylla kum u President, Samla Thom miki Dkhar kum u Vice president, Samla Eladmiki Lamare kum u Secretary, Emiki Shaphrang Dkhar, Asst Secretary nalor kiwei kiwei ki nongkitkam ba hakhmat bad 42 ngut ki Executive Members.
