Shillong, Jymmang 14: Ka seng trei mon sngewbha ka Khasi Jaintia Welfare Association (KJWA) mynta ka sngi kala pynbna paidbah ba ia ka “State Comsumer Helpline Meghalaya” la pyntrei kam ha ka jylla naduh mynta ka sngi bad u number ba ki nongthied nongpet kilah ban phone ban ujor ia ki jingeh kaba ki ia kynduh ha ka thied ka pet u long 1800-345-3687, la ong u Bah G Reenbohn president.
Haba kren ha ki lad pathai khubor, u Bah Reenbohn u la ong ba ka seng kala kren ia kane ka phang halor ka hok jong ki nongthied nongpet naduh u snem 2008 bad ka sorkar kala phah ia ki dkhot ka seng KJWA ban leit sha hikai sha Delgi naduh u snem 2009. Ia ki la phah da ka tnad sam bam samdih jong ka sorkar jylla.
Ha dien ba la wan phai kila ai ia ka kaiphot sha ka sorkar bad kane ka kam kala sah teng bad kum ka seng kim shym la hmih lynti ruh ba kane kam dang iaid sha khmat, hynrei dei ha ka 15th Nohprah 2016 ba ka sorkar bad k seng kila ia soi ia ka soskular jingiasngewthuh jingmut ban pyntrei kam noh ia kane ka “State Comsumer Helpline Meghalaya”.
U Bah Shemborlang Rynjah manager jong ka “State Comsumer Helpline Meghalaya” haba batai ia ka rkum trei kam jong kane ka jingiarap ia ki nongthied nongpet, u la ong ba ki paidbah haba ki thied jingthied haba ki shem ba kila shah shukor ki lah ban phone sha ka number kaba la ai haneng ban ujor bad na ka liang jong ki nongtrei kiba don ha kane ka “State Comsumer Helpline Meghalaya” kin ia rap ban pynbeit.
Kane ka Helpline kan long na ka bynta ka jylla Meghalaya baroh kawei, kane ka jingiarap kam dei eh tang na ka bynta ki nongthied nongpet, hynrei na ka bynta ki Insurance bad ki Bank ruh kum juh. Mynta ka dang dei tang ka jingsdang bad ki nongtrei kiba don ha kane ka helpline ki dang don kam ban ioh ia ki jinghikai.
La pynshai ruh ba ia kane ka kam, ym dei ba ka KJWA kan leh marwei hynrei ka long da ka jingiatrei lang bad ka tnad sam bam sam dih jong ka sorkar jylla. Ka jinglut jingsep na ka bynta ki nongtrei la bei da ka sorkar pdeng katba ia ka bai wai ophis ka sorkar kam don jingsiew ia kaba ki dkhot jong ka seng ki hap ban ia siew hi ia ka bai wai iing.
