Shillong, Naitung 09: Ka tnad District Council Affair jong ka sorkar jylla kala bethah ia ka Khasi Hills Autonomous District Council (KHADC) ban pynlong ia ka dorbar ba kyrpang la shai ka sngi kumba la dawa da ki MDC jong ka iing dorbar.
U Bah SH Shylla nongialam jong ka Khasi Democratic Alliance (KDA) haba kren ha u SP News Agency u la iathuh ba la khot ia ka dorbar kyrpang la shai ka sngi hapoh jong ka KHADC. Kane ka jingkhot ia ka dorbar kyrpang ka long halor ka jingdawa jong ki MDC kiba la leit ban ia kynduh ia u myntri rangbah kajylla ha kine ki sngi kiba la dep.
Lah ban kdew ba ka jingdawa jong ki MDC ban khot ia ka dorbar ba kyrpang ka long ba ki la kwah ban weng noh ia u CEM ba mynta u bah Pynshngianlang Syiem, ban weng ia u CEM ka shong ha ka jingbun paid hapoh ka iing dorbar. Ka jingkhot ia ka dorbar ba kyrpang ka long ban ia pyni ia ka jingbun paid.
Kaktum ka jingkam jong ka liang kaba kwah ban weng ia u Bah Pynshngianglang Syiem na ka kam CEM ki don 16 ngut ha ka iing dorbar kaba 29 ngut, kine ki 16 ngut ki long na ka seng UDP, NPP, HSPDP bad la sngewthuh ruh ba ki don dkhot na ka PDF ruh kiba ia don lang ha kane ka kynhun.
Ia kane ka jingiakhih ha ka sian pyrthei hapoh KHADC kan shai bha la shai ka sngi hato u CEM ba mynta u dang ioh ne em ia ka jingbun paid ban beteng ia ka kam bad lada yn don shuh ia ka jingbun paid la shai ka sngi kan shai ba u la hap ban shah weng na ka kam CEM.
