Shillong, Nohprah 20: U myntri rangbah ka jylla u Dr Mukul Sangma u la plie mynta ka sngi ia ka CHC ha Mawphlang ha dien 17 snem naduh ba la sdang ban tei ia ka, ha ka jingiadon lang u MLA kane ka jaka u Bah Kennedy Khyriem u Bah Lamphrang Blah MDC u ba dei ruh u myntri jong ka Hima Mawphlang, u Bah RV Lyngdoh myntri kam pynroi sor.
Ha ka jingkren jong u Dr Mukul u la ong ba u dap da ka jingkmen ban ioh ban plie ia kane ka CHC wat la ia ka u mawnongrim ia kane ka jaka ai jingsumar la buh 17 snem mynshuwa, da ka jingdon jong kane ka jaka ai jingsumar kan long ka jingkyrkhuh ia ki paidbah ha katei ka thain.
U myntri rangbah u la ong ba ka Ri hi baroh kawei ka dang ialeh mynta ban pynioh ia ki jaka ai jingsumar ia ki paidbah bad bun na ki jaka ai jingsumar jong ka sorkar ym pat lah ban pyndon kam namar ka jingduna ki doktor. Da ka jingsdang ban tei ia ki ar tylli ki jaka pule doktor ha ka jylla kane kan sa iarap shibun ban ioh ia ki doktor.
U myntri rangbah ka jylla u la kren ruh ha kane ka jingialang ha kaba ia dei bad ka Meghalaya Health Insurance Scheme (MHIS) ba ka dei ka skhim kaba la ai jingiarap shibun eh ia ki paidbah jong ka jylla bad kane ka jingleh jong ka sorkar ka long ban pynangnud ia kaei kaba ki paidbah ki kwah.
Kiwei kiba la kren ha kane ka jingialang ki long u Bah RV Lyngdoh myntri kam pynroi sor, u Bah Kennedy Khyriem MLA u Bah L Blah MDC bad kiwei kiwei dei kiba dei ki doktor.
