Shillong, Jymmang 08: Ka Dorbar Ki Khlieh Nongsynshar ka Bri Hynniewtrep (KDKNBH) kala kyntu ia baroh ki shnong ba kin thaw ia ka Kommittee Rep ha ki shnong ki shnong ban ia leh p
yrshah ia kane ka COVID-19 kaba ym pat lah ban tip haduh katno kane ka khlam kan neh.
U bah John F Kharshiing ba dei u lamphang ka KDKNBH u la kyntu ban leh kyrkieh ba ki Nongsynshar Hima ba kin kyntu ia ki khun ki hajar ha la ki Shnong ki Raid bad Hima khamtam ki nongsynshar Shnong ba kin shim khia namar kane ka thma pyrshah khlam Covid19.
Ka long kaba donkam ban kyntu jur ia ki khun ki hajar ba kin shim khia ban thaw ki lad ki lynti hapoh shnong ban ia rep kat ba lah eh ha ki kper ki jaka kiba lait ha kum kane ka por ba ialeh thma COVID-19 kum shi bynta ban long kiba la khreh ioh ba wan kano kano ka jingeh ne ka jingkyrduh namar kane ka jingialeh kan dang shim por.
La kyntu jur ruh ia ki Khlieh Nongsynshar shnong ki Raid bad Hima khamtam ki shnong kiba bun ki nongrep ban shim khia ban thaw ia ka kommittee Ka rep ka riang khnang ban ioh ia kren hapoh shnong ban long kiba la khreh ha baroh ki liang.
Shuh shuh khyndiat halor katei ka khlam covid19 ki stad scientist ki pynshlur ia ki paidbah ban bam ki jingbam kiba tei bad pynkhlain ia ka met. Kan long kaba myntoi shibun ia ki nongshong shnong ban ioh ban bam da ki marbam kiba khlem dawai bad kiba mih bad sei na la ka jong ka shnong ne na la ka jong ka Ri.
kumta sa shisien la kyntu ia ki Nongsynshar baroh naduh Shnong, Raid haduh Hima ba kin ia shim khia halor kane ka jingkyrpad kane ka long katkum ka kyrwoh kaba la phah da u Bah John F Kharshiing mynta ka sngi lamphang ka Ka Dorbar Ki Khlieh Nongsynshar ka Bri Hynniewtrep, bad nongai buid bad nongai ktien ka Federation jong ki Khasi States.
