Shillong, Lber 21: Kan long ka sngi kaban sah jingkynmaw ha ka History jong ka FKJGP bad ha ka thain Upper Shillong hi baroh kawei lyngba ka jing pynkha tnat ba thymmai jong ka FKJGP Upper Shillong Circle da ka FKJGP Lai Shnong Area Unit kum shibynta ban teh song, ban wanrah ia ka jinglong kawei bad kumjuh ruh ban pynkhlain ia ka rukom treikam jong ka Seng.
Ka FKJGP Upper Shillong Circle hapoh ka jingialam jong u President U Samla Kitboklang Nongphlang uba dei ruh ha kajuh ka por u Education Secretary FKJGP Central Body ha ka 19thMarch 2018 kala lum da ka jingialang kaba kyrpang ia Lai Tylli ki Unit jong ka Seng kiba kynthup ia ka Mawnianglah, Mawkhan & Mawrashe Unit ban saindur thymmai bad khamtam eh ban pynkhlain da kaba ai bor shuh shuh ia ka rukom treikam jong kitei ki Lai Tylli ki Unit.
Ha katei ka jingialang kaba kyrpang la ia don ryngkat ruh ba ki Nongkitkam jong baroh lai tylli ki Dorbar Shnong ha kaba la ioh ruh ia ka jingkren ai Mynsiem na i Bah Christplin Kharmawphlang, Rangbah Shnong Mawrashe bad kumjuh ruh na ki Lai Ngut ki President jong ki Seng Longkmie jong ka Shnong Mawnianglah, Mawkhan & Mawrashe ha kaba na ka liang jong baroh.
Ki Nongkren kila pynpaw ia ka jing sngew kmen shikatdei eh ban sakhi ia ka jing ia treikam lang jong baroh 3 tylli ki Unit jong ka Seng FKJGP namar kila ong ba kum ki shnong kiba marjan mynta la bun bun snem kila ju pyrshang ban iatreilang ha kiba bun ki liang khamtam eh ban rat diengkhong ia kiba bunjait ki jing sniew kiba la kha roi na ka daw ka jing jyllei jong ki Nong Die Kyiad be-ain ha ki sawdong sawkun jong u pud u sam jong ki shnong ki thaw bad shaduh ki bynta jong u Lum Shyllong, Ki Nongialam jong kitei ki Seng longkmie kila pynpaw ba ki don ka jingshaniah kaba skhem ha ka FKJGP bad ki long kiba kloi ban ai ka jing ia treilang la ka long ha kano kano ka por ba kum ka seng ka donkam ia ka jing ia snohkti lang.
Ia ka jingialang ha katei ka sngi la pyniaid da u Samla Arphin Stone Marbaniang, Asst. General Secretary FKJGP Upper Shillong Circle. Haba kren ha ka jingialang paidbah ha katei ka sngi na ka liang jong u Samla Kitboklang Nongphlang, President FKJGP Upper Shillong Circle ula ong ba ki Nongialam ki leit bad ki wan hynrei ki Nongrim jong ka Seng ka neh kumjuh, na ka liang jong utei u samla Nongialam u la kyntu jur ruh ia ki khun samla ba kin long kum u Mot jong ka jing kyrmen na ka bynta ban saindur iaka lawei jong ki pateng ki ban sa wan.
La kyntu ba dei ban skhem jingmut triang ban iakhun ban wanrah ia ka jingkylla la ka long ha ka imlang ka sahlang, ka ioh ka kot bad ha ka kam synshar khaddar. Shuh shuh na ka liang jong utei u Samla Nongialam u la ong ruh ba ka jing tehsong ia ki lai Tylli ki Unit jong ka Seng ka long thik kum ki ‘Lai Tylli ki Mawbyrsiew’ ban shakri khambha ia kitei ki Lai Tylli ki shnong bad u la ong ruh ba lyngba kane ka jing aibor ban pynkha ia ka tnat kaba thymmai jong ka Seng kalong ruh kum shibynta ban pynmih ban ban sei ia ki Nongialam kiba don ka jingkit khlieh naka bynta ka imlang ka sahlang, ka thain bad ia ka jaitbynriew hi baroh kawei.
Ia ki Nongialam bad Nongkitkam jong ka FKJGP Lai Shnong Area Unit (Mawnianglah, Mawkhan & Mawrashe) la pyn tian smai da u Samla Kitboklang Nongphlang, President FKJGP Upper Shillong Circle ha kaba ula ai ia ka jing kyrkhu kyrdoh bad kitbok kitrwiang khnang ba kin long shisha kita ki ‘Ki Mawbyrsiew’ ban shakri ia ka thain bad ia ka jaitbynriew hi baroh kawei. Ki Nongkitkam ba thymmai jong ka FKJGP Lai Shnong (Mawnianglah, Mawkhan & Mawrashe)Area Unit ki long, bah Hopewell kharkongor la shah jied kum u president, Bah Baseilang Umdor kum u Vice President, Bah Shahbok langstieh kum u general secretary ha kane ka sngi la thung ruh ia ki dkhot jong ka Executive members.
