Jowai, Lber 27: ka Jaintia Students’ Union (JSU) sengkmie haka jingpyllait khubor mynta ka sngi lyngba u Art & Culture Secretary u samla Chebha Passa kala pynpaw iaka jingsngewnguh ia u CEM jongka JHADC bad kumjuh ia ka EC jong u bad kumjuh ia baroh ki MDC kiba la trei shitom ha kaba la lah ban pynkha syndon iaka Department Art & Culture hapoh ka JHADC ha kane ka Dorbar kaba dang shudep.
ka JSU ka pynpaw iaka jingsngewkmen kaba khraw halor kane ka sienjam kaba khraw kaba ka JHADC hapoh ka jingialam u ma T. Shwat kum u CEM kala lah ban pynkha ia kane ka Department kaba donkam bha hapoh ka Council naka bynta ban ri ban sumar bad ban peit iaka Dustur ka Riti ba kan neh kan sah hapoh ka Ri bad ka Jaitbynriew hi baroh kawei, bad ha kajuh ka por ha kaba la buh ruh haka mang tyngka kaba haduh 88.85 lak ryngkat bad u wei u ophisar bad hynriew ngut ki nongtrei.
kum ban shu pynkynmaw ka JSU hapoh ka jingialam jong u President U Rikut N Parien bad u General Secretary U Emperor Bareh kala wan rah ia kane ka mat ha khmat u CEM bad kumjuh haki EM baroh ha kine ki bnai bala dep, ha kaba u CEM ruh u la kular ban shimkhia ia kane ka bynta, bad khlem da shong kli kti u CEM bad ka EC jongu kila trei shitom ha kaba la lah shisha ban punurlong ia kane ka mat naka bynta ka bha ka miat jongka ri bad ka Jaitbynriew.
kiwei pat ki mat kiba la wanrah ha khmat u CEM ki long ka jingpynbeit noh ia u Pud u sam jong baroh ki Elaka kiba don hapoh ka Ri lum Jaintia, bad kumjuh ban thaw ia ki Ain ban iada bad ban pynneh pynsah ia ki um kiwah kum ka wah Myntdu, ka wah Lukha bad kiwei kiwei. kine ruh ki dei ki mat kiba donkam bha bad ka JSU ka kyrmen skhem b ka JHADC hapoh ka jingialam u CEM kan shimkhia ha kaban pynur long iaki.
shuh shuh ka JSU kam lah ruh khlem da pynpaw iaka jingsngewnguh ia u CEMba don burom bad iaka EC ka jongu halor ka jingpynurlong bad pyntreikam iaka Non Encumbrance Certificate ha kine ki por bala dep kumba la ai jingmut bad kyrpad daka JSU naka bynta ka bha ka miat jongki paidbah.
Khatduh eh ka JSU ka kitbok kit rwiang ia kane ka EC jongka JHADC hapoh ka jingialam jong u CEM ma T. Shiwat ba kan dang lah shuh shuh ban trei ban ban thaw ia ki lad ki lynti naka bynta ka bha ka miat bad ka Suk ka Sain jong ka Ri bad ka Jaitbynriew baroh kawei.
