Shillong, Nailar 18: Ka seng Hynniewtrep Youths’ Council (HYC) mynta ka sngi kala pynlait paidbah ia ka kot kumno ban teh lakam ia ka jingwan rung kyrthep ki briew sha kane ka jylla. Ia kane ka kot lyngkdop ia kaba la ai kyrteng ‘Save Hynniewtrep Mission’ la pynlait da u General Secretary u Bah Robertjube K Jahrin ha Shillong Press club.
U tei u nongialam jong ka HYC, u la ong ba ia kane ka kot ki sa sam sha baroh ki shnong ba kin ia pule ia ka bad lada don ki shnong kiba kwah ban dang ioh jingpynshai shuh shuh halor jong kane ka jingthoh na ka liang jong ka seng ka kloi ban leit ai jingpynshai.
Haba ia dei bad ka Meghalaya Safty bad Security Act, 2016 bad kum juh ia ka Meghalaya Safety bad Security Rule, 2017 na ka liang jong ka seng kan nym pdiang ia kane namar ka dei ka ain kaba khlem bniah, na ka liang jong ka seng ka kloi ban ia tyrko bad ka sorkar lada don kiba lah ban pynbeit ia kane namar kane ka ain kaba la shna da ka sorkar ka kynthup lang ruh ia ki trai shnong.
U Bah Robertjune u la ong ba u myntri rangbah ka jylla u Dr Mukul Sangma ym don ka jingsngewthuh ha kaba ia dei bad ka Inner Line Permit (ILP). U la ai nuksa ba ka jylla Manipur haba ka shnong ia ka “Protection of Manipur Bill, 2015” ka pynlait ia ki trai shnong, katba ha kane ka Meghalaya Safety and Security Act bad Rule ki trai shnong ruh kila long ki nongwan rung sha kane ka jylla.
U Bah Kharjahrin u la ong ba lada don ba leit sha iing bishar kane ka Rule jong ka sorkar kan sah pyndam namar ka rule kan nym lah ban long sha barjong ka Act, na ka liang jong ka seng kan iaid sha khmat ha kaba ia dei bad ki jingdawa ban ioh ia ka ain kaba khlain ban ia da ia ka jaidbynriew.
Ka jingiakhih jong ki seng bhalang ka long ban iada na ka jingwan rung kyrthep jong ki briew kiba na sha bar ha kane ka jylla hynrei ka ain kaba la shna da ka sorkar kam shym la kren ei ei ban iada ia ka jingwan rung kyrthep jong ki briew kiba na bar. Ka HYC ka ieng skhem ba u snem 1971 u dei bna long u snem ot kyrteng na ka bynta ban khanglad ia ka jingwan jong ki briew kiba na bar sha kane ka jylla.
