Shillong, Nailur 16: Ka District Legal Service Authourity (DLSA) mynta ka sngi kala pynlong ia ka jingialehkai kaba lyngkot ha Police Bazar ban pynsngewthuh ia ki briew ba kumno ka jingdih drugs ka ialam sha ki kam awaria.
Ia kane ka jingialehkai la pynwadur da ka Sardar Police Station, ki nongiashim bynta ki dei ki samla pule jong ka tnad Social Work Department jong ka Martin Luther Christian University, Professionals Academy lem bad ki dkhot jong ka Shillong Bar Association ryngkat ki nongtrei jong ka Shillong Court.
Kiba la kren ha kane ka jingialang halor ka jingsniew jong u drugs bad kumno ka ialam sha ki kam awaria la kren da ka kong B. Khriam, CJM, Shillong, u Davis R Marak, IPS, Superintendent ki pulit jong ka East Khasi Hills, Shillong, u Bah Vivek Syiem, MPS, Superintendent ki pulit Shillong City, East Khasi Hills, Shillong, u Rajiv Nath, Public Prosecutor, Shillong.
Baroh ki nongkren ha kane ka sngi kila ban ia kawei ka bynta ba kumno ban ialeh pyrshah ia kane ka kam dih drugs bad ki kam awaria kaba pynsiew shisha ia ka imlang shalang, ia kane ka jingialehkai la pynlong halor ka jingsain dur jong u Bah E. Kharumnuid, District bad Sessions Judge, East Khasi Hills, Shillong.